Të bashkuar, Noka-Bardhi: Nga Shkodra nis rrëzimi i regjimit kriminal të Edi Ramës!
Pas bashkimit përfundimtar, Sekretari i Përgjithshëm i Partisë Demokratike, Flamur Noka, së bashku me Kryetarin e Grupit Parlamentar të PD, Gazment Bardhi, u shprehën se nisën takimin në Shkodër ku dhe do të nis qëndresa për rrëzimin e regjimit kriminal të Edi Ramës ndërsa e bëri të qartë se dera e kësaj partie është e hapur për çdo demokrat, qytetar, politikan apo jo, deputet apo jo që sheh rrezikun vetëm te Edi Rama.
“Shkodra është qyteti i qëndresës dhe rezistencës. Shkodra është qyteti nga i cili ka nisur çdo përmbysje regjimesh. Pas bashkimit tonë përfundimtar aq të pritur nga demokratët, e nisëm këtë proces të bashkimit në bazë në Shkodër. Nga Shkodra do japim mesazhin e bashkimit në të gjithë Shqipërinë. Nga Shkodra do nisim qëndresën për rrëzimin e regjimit kriminal të Edi Ramës. Ajo ditë e shumëpritur po vjen. Ne do ti prijmë kësaj betejë për demokratë dhe për Shqipërinë,” tha Flamur Noka duke e bërë të qartë se ajo që demokratët presin është që PD e bashkuar të fuqizohet të energjizohet të ringrihet dhe të rrëzojë këtë regjim.
“Ne do të jemi bashkë në këtë mision. Kjo nuk është vetëm një detyrë ky është një mision i të gjithëve ne dhe momenti na kërkon që këtë mision ta përmbushim ne. Ajo që është e rëndësishme për ne është se dera jonë ka qënë dhe është e hapur për çdo demokrat dhe për çdo qytetar të këtij vendi, politikan apo jo, deputet apo jo që sheh rrezikun vetëm te Edi Rama dhe regjimi i tij.
Dera jonë do të ngelet e hapur dora jonë do të ngelet e shtrirë por është në zgjedhjen e gjithsecilit të rreshtohet me regjimin apo me opozitën. Për ne qytetarët shqiptarë po presin rreshtimin përkrah opozitës për tu përballur me Edi Ramën,” tha Sekretari i Përgjithshëm i PD, Flamur Noka, me mesazhin e qartë nga Shkodra duke përfunduar:
“Për çdo demokrat dhe për çdo qytetar që është në betejë me Edi Ramën dhe regjimit, Lulzim Basha dhe Enkelejd Alibeaj deri më sot e kanë vërtetuar se janë dy pengje të regjimit, për të tjerët dera është e hapur dhe do të jetë e hapur.”
Nuk mund të kishte alternativë tjetër për të nisur këtë tur të bashkimit të demokratëve në bazë pas bashkimit të lidershipit drejtues të Partisë Demokratike tha Kryetari i Grupit Parlamentar të PD, Gazment Bardhi, pasi Shkodra edhe për simbolikën që përfaqëson, por dhe Dega e PD Shkodër ka qënë pjesë e një sulmi të vazhdueshëm nga qeveria por edhe nga grupet kriminale duke arritur të deformojnë edhe vullnetin e qytetarëve të Shkodrës në zgjedhjet lokale.
“Bashkimi ka ndodhur. Ka një pjesë shumë të vogël të demokratëve që ende janë në një rrugë të gabuar dhe unë gjej rastin nga Shkodra ti ftoj ti bashkohen PD ti bashkohen betejës kundër Edi Ramës.
Rruga e tyre për të qëndruar përballë opozitës dhe jo përballë Edi Ramës, në gjykimin tonë është një rrugë e gabuar që nuk e ndihmon Shqipërinë dhe popullin opozitar.
Pothuajse demokratët janë të bashkuar edhe në bazë, turi jonë do të synojë për të thithur edhe ata pak demokratë që ndodhen në një rrugë të gabuar. Duhet të jenë me ne për të qënë përballë Edi Ramës dhe jo përballë opozitës,” tha Gazment Bardhi duke shprehur bindjen se demokratët kanë ditur të tregojnë forcën e tyre të vërtetë sa herë që kanë qënë në momentet e tyre të vështira dhe duke qenë të gjithë bashkë kjo jep forcë dhe ta tejkalojnë situatën nëtë cilën ndodhet PD.
“Secili prej deputetëve duhet të jetë në PD. E kanë vendin te PD krah demokratëve përballë Edi Ramës. Cilido që zgjedh një rrugë tjetër nuk përfaqëson PD dhe nuk është në PD.
Unë jam aty ku janë demokratët. Kam bindjen e plotë se PD është e bashkuar, ato pak kolegë që nuk janë bashkuar ende të jeni të sigurtë që do e kuptojnë se janë në rrugë të gabuar dhe vendi i tyre është krah demokratëve përballë Edi Ramës,” tha Sekretari i Përgjithshëm i PD, Gazment bardhi, nga Shkodra ndërsa përfundoi duke e bërë të qartë se kryetar i PD është Sali Berisha ndërsa i bëri thirrje edhe gjykatës:
“Nuk ka askush dyshim dhe nuk do duhet të ketë as dyshim dhe gjykata se ku është dhe kush është PD. Sa kohë e kanë zgjedhur shumica e anëtarëve të PD Sali Berisha është kryetar i PD.”
Ndryshe, qëllimi i këtij takimi të Sekretarit të Përgjithshëm të Partisë Demokratike, Flamur Noka, dhe Kryetarit të Grupit Parlamentar të PD, Gazment Bardhi, në Shkodër, përveç se të dëshmohet uniteti i bashkimit të PD i cili ndodhi fundjavën që shkoi, ishte dhe mobilizimi i strukturave për pjesëmarrje në protestën kombëtare të 20 Shkurtit në Tiranë.
