Të dhënat e sigurisë kombëtare në duart e bandave, Berisha: Edi Rama të jap dorëheqje!
Të dhënat e sigurisë kombëtare kanë kaluar në duart e bandave dhe armiqve të Shqipërisë dhe NATO-s, tha sot Kryetari i Partisë Demokratike, Sali Berisha, ndërsa kërkoi dorëheqjen e menjëhershme të Edi Ramës dhe Belinda Ballukut nga postet e tyre.
“Çdo ditë që kalon po rrit në mënyrë eksponenciale zemërimin dhe revoltën tek qytetarët e Tiranës dhe qytetarët shqiptarë. Po rrit vendosmërinë e tyre për t’i larguar me çdo çmim nga pushteti këta hajdutë që tejkalojnë me vjedhjet e fondeve dhe pasurive publike të gjitha vjedhjet që janë bërë në 113 vjet të shtetit shqiptar,” tha Sali Berisha ndërsa renditi aktet më të rënda të Edi Ramës si bllokimi i drejtësisë, refuzimi për heqjen e imunitetit dhe arrestimin e Belinda Ballukut, si dhe diktimi i vendimit të Gjykatës Kushtetuese.
Dhe jo vetëm kaq!
“Në dosjen e AKSHI-t janë veprat më të shëmtuara në historinë e kombit, vjedhja e plotë dhe totale të gjitha të dhënave të sigurisë kombëtare dhe ato që vijnë nga Aleanca e Atlantikut të Veriut në Shqipëri. Kalimi i këtyre të dhënave në duart e bandave dhe armiqve të betuar të kombit shqiptar dhe NATO-s.”
Qytetarët shqiptarë janë të zemëruar, të revoltuar kundër Edi Ramës dhe të gatshëm që të paguajnë çdo çmim, tha në fund Kryetari i Partisë Demokratike, duke përshëndet qytetarët e Vlorës për protestën e tyre dinjitoze.
“Qytetarë dhe qytetare, ju përjetoni padrejtësitë më të mëdha. Protesta juaj kundër regjimit është shpëtimtare për ju dhe për Shqipërinë.
Uji nuk mungon vetëm në Vlorë, uji mungon në mbarë Shqipërinë.
Arbitrariteti nuk ushtrohet vetëm në Vlorë, ushtrohet në çdo skaj të këtij vendi,” tha Kryetari i Partisë Demokratike, Sali Berisha, duke përfunduar:
“Për të shpëtuar duhet zëri juaj, duhet angazhimi juaj qytetar.
Të përzëmë sa më parë këtë të keqe të madhe që i ka rënë në krye Shqipërisë.
PD angazhohet, opozita angazhohet në betejën finale për largimin e organizatës kriminale nga pushteti, organizatë që kryesohet nga Edi Rama.”
Fjala e plotë:
Jam sot këtu për të kërkuar dorëheqjen e menjëhershme të Edi Ramës dhe Lubi Ballukut nga postet e tyre.
Çdo ditë që kalon po rrit në mënyrë eksponenciale zemërimin dhe revoltën tek qytetarët e Tiranës dhe qytetarët shqiptarë.
Po rrit vendosmërinë e tyre për t’i larguar me çdo çmim nga pushteti këta hajdutë që tejkalojnë me vjedhjet e fondeve dhe pasurive publike të gjitha vjedhjet që janë bërë në 113 vjet të shtetit shqiptar.
Bllokimi i drejtësisë nga Edi Rama, refuzimi për heqjen e imunitetit dhe arrestimin e Lubi Ballukut, diktimi i vendimit të Gjykatës Kushtetuese janë aktet më të rënda, më të paprecedent në historinë e një shteti, është poshtërimi më i madh që u bëhet qytetarëve shqiptarë, duke u thënë atyre se ne u kemi vjedhur, u vjedhim dhe do t’u vjedhim sepse jemi mbi ligjin, mbi Kushtetutën dhe kjo përbën për çdo qytetar që beson në barazinë para ligjit dhe ligjin, që beson Kushtetutën dhe rendin kushtetuese.
Edi Rama përgjegjësitë i ka më të rënda se Lubi Balluku sepse nëse ata kanë vjedhur dhe shpërdoruar miliarda në veprat publike, ndërmarrja, kopshti privat i Edi Ramës, AKSHI, nuk është kontrolluar nga Lubi Balluku.
AKSHI ka qenë ekskluzivitet total i familjes Rama.
Në dosjen e AKSHI-t janë veprat më të shëmtuara në historinë e kombit, vjedhja e plotë dhe totale të gjitha të dhënave të sigurisë kombëtare dhe ato që vijnë nga Aleanca e Atlantikut të Veriut në Shqipëri.
Kalimi i këtyre të dhënave në duart e bandave dhe armiqve të betuar të kombit shqiptar dhe NATO-s.
Dosja e AKSHI-t nuk është pra vetëm dosja e vjedhjeve të qindra milionë eurove përmes baxhanakut të tij në AKSHI, dhe implikimit siç tregojnë regjistrimet të bashkëshortes së tij në përcaktimin e fituesve, nuk është vetëm pengmarrjet, 3 pengmarrje jo 2, Gerond Meçe me 12 gusht, Daniel Shima një javë më vonë dhe një tjetër biznesmen i ri i marrë peng për shkak të lojërave të fatit, monopol ekskluziv dhe total i kartelit të drogës në Elbasan.
Edi Rama, që bëri dje avokatin mjeran të Lubisë bis, sipas të cilit prokuroria e ka akuzuar atë për përdorimin e fondeve, përgëzoj një gazetar i cili shkruante se Rama ka përdorur aty gjuhën oruelliane, ku vjedhja e shefit quhet përdorim, ku plaçkitja quhet mbikëqyrje nga shefi.
Edi Rama pretendonte se Linda e dytë e tij, se i kanë rastisur të treja me Linda, Belinda, Mirlinda, Linda, se si i merr fati të tria në një rreth të kuq, se Mirlinda po akuzohet se ka përdorur fonde.
Po ka mbrojtje më kriminale, më të turpshme se kjo?
Si mund të akuzosh se ka përdorur fondet?
Akuzohet se ka vjedhur fondet. Se ka drejtuar një organizatë kriminale me Ergys Agasin, me koordinatorin e tij, dhe se fondet kanë shkuar që të gjitha në familjen supermafioze Rama.
Ndaj dhe për ta mbyllur edhe njëherë, jep dorëheqjen sa më parë.
Je i pashpresë.
Qytetarët shqiptarë janë të zemëruar, të revoltuar kundër teje dhe të gatshëm që të paguajnë çdo çmim për familjen tuaj.
Së dyti, dua të përshëndes përzemërsisht qytetarët e Vlorës për protestën e tyre dinjitozë, për fibrën e tyre qytetare, që reaguan në mënyrën më të fuqishme, ua zunë galanë në fyt zyrtarëve makutë, që kanë vjedhur fondet e ujësjellësit dhe ishin mbledhur të festonin me to.
Qytetarë dhe qytetare, ju përjetoni padrejtësitë më të mëdha. Protesta juaj kundër regjimit është shpëtimtare për ju dhe për Shqipërinë.
Uji nuk mungon vetëm në Vlorë, uji mungon në mbarë Shqipërinë.
Arbitrariteti nuk ushtrohet vetëm në Vlorë, ushtrohet në çdo skaj të këtij vendi.
Për të shpëtuar duhet zëri juaj, duhet angazhimi juaj qytetar.
Të përzëmë sa më parë këtë të keqe të madhe që i ka rënë në krye Shqipërisë.
PD angazhohet, opozita angazhohet në betejën finale për largimin e organizatës kriminale nga pushteti, organizatë që kryesohet nga Edi Rama.
