Të etur, ikën nga lumi!
nga Agim Popoci
Më në fund u zyrtarizua ajo që çdo njeri racional e kishte të qartë, negociatori i Lulzim Bashës u tërhoq nga negociatat për bashkimin e Partisë Demokratike për zgjedhjet lokale të 14 Majit 2023, duke i shpallë të dështuara!
Për pjesën tjetër, që priste epilogun e kësaj negociate edhe pas fyerjeve dhe përbuzjeve që Gazment Bardhi lançoi drejt liderit të Partisë Demokratike, Sali Berisha; Edhe pas nxjerrjes në media të ofertës së tij në negociata me përfaqësuesin e PD, Edi Paloka; Dhe, në fund, edhe pas proklamimit triumfues nga ky grup asqerësh të Edi Ramës, se do ndodhë hataja në seancën e 3 Nëntorit në Gjykatën e Apelit dhe ata përfundimisht do të zotërojnë vulën, logon dhe selinë e partisë, përgjigja ishte dhënë me kohë por nuk u kishte thë njeri, LEXONI!
Në momentin kur Gazment Bardhi u shpall negociator nga grupi i deputetëve të Lulzim Bashës, që kurrë nuk kanë luftuar për votën, nuk dinë çfarë është beteja elektorale dhe nuk mund ti referohen qoftë dhe një votuesi përveç, Sali Berisha, u shpallën dhe qëllimet ogurzeza të Bashës!
Kur Gazment Bardhi u shpall Ministër i Drejtësisë në qeverinë teknike në vitin 2017 dhe nuk e njihte njeri, nga Lulzim Basha dhe ekipi i tij, Gazment Bardhi u përfol si njeri i Berishës! I tillë ngeli dhe kur u emërua Sekretar i Përgjithshëm ndonëse në korridoret e selisë së PD, të gjithë e quanin Conchita!
Si njeri i Berishës, Conchita vazhdoi të cilësohej nga njerëzit e Bashës edhe kur gënjeu se nuk kishte dyer të blinduara në selinë e PD, edhe kur u internua në Elbasan për fushatën zgjedhore ku thuhej se kishte njerëz që e kontrollonin dhe konsideroheshin truproja, dhe, ky llagap nuk iu nda edhe kur u zbulua se i servirte Lulzim Bashës kafe në shtëpi!
Gazment Bardhi kot që shante Berishën poshtë e lartë, komploti i Bashës kishte ngjizje të fortë, dhe ai ngeli si njeriu i Sali Berishës deri sa bëri tradhtinë e pafalshme që demokratët nuk e kanë për zakon, publikoi ofertën përfundimtare që kishte dhënë në negociata ndërkohë ishin vetëm dy negociator!
Pra, ky njeri mund të bëjë shumë gjëra në këtë botë, të fitoj dhe procesin gjyqësor për qenin, por demokrat nuk bëhet kurrë, dhe këtë e kanë të qartë anëtarët e Partisë Demokratike që më shumë e asgjë tjetër, ligj e kanë fjalën; E ky njeri u kuptua se përveç tjerave nuk e ka as fjalën e tij që kishte dhënë! Fjalë, që demokratët e respektuan edhe në negociatat me tre njerëzit më të poshtër shqipfolës në botë, Fatos Nanon, Ilir Meta dhe Edi Rama!
Momenti i dytë që humbi kuptimin e negociatave ishte përmbajtja e dokumentit që u publikua nga mediat mbi ofertën e Gazment Bardhit! Sikur pala e Lulzim Bashës të kërkonte primaret, do të ishte shumë normale për situatën në të cilën ata ndodhen pranë këtij lumi të trazuar, por, kur kjo palë e refuzon dhe përdhos votën e demokratëve, nuk ka se si ti vihet emri!
Çfarë kërkuan këto ufo politike?! Negociatori i Lulzim Bashës kërkoi që kandidati i përbashkët fitues për kryetar bashkie të bëhet me “sistem pikëzimi” dhe shpallet nga Këshilli Drejtues Politik.
Ç’është ky pikëzim dhe pse nuk ka kuptim në një proces demokratik! Oferta e Bashës kërkon që 50 % e pikëve të përcaktohen nga votimi sipas parimit “një anëtar / 1 votë”! Dhe, pasi të jetë përcaktuar kandidati nga vota e demokratëve, mendimi i tyre përgjysmohet dhe ky grupim kërkon që 50 % e pikëve tjera të përcaktohet nga “vrojtimi i opinionit të gjerë publik” nëpërmjet sondazheve.
Absurde, po, por jo e gjitha përfundon këtu!
Kandidatët që përfshihen në procesin e vlerësimit propozohen nga Këshilli Drejtues Politik në nivel vendor dhe miratohen me unanimitet nga Këshilli Drejtues Politik në nivel qendror, ishte kërkesa e deputetëve që duan të futen në garën e ardhshme elektorale me një kandidatë të përbashkët!
Pra, ka mbi një vit që ata Grupin Parlamentar nuk arrijnë ta bëjnë bashkë, unanim, dhe kërkojnë që të mos respektohet vota edhe pas votimit të kandidatit me parimin “një anëtar / 1 votë”, dhe të krijojnë një Këshill Drejtues Politik në nivel vendor dhe qendror, anëtarët e së cilës kanë edhe të drejtën e vetos!
Dhe, përkundër kësaj situate të turpshme për 1 vit në Grupin Parlamentar të PD prej 44 personave, që kurrë nuk u mblodhë i tëri, 17 deputetë lëshojnë deklaratën për dështimin e negociatave duke folë sërish për unanimitet të paqënë:
“Më datë 10 Tetor Grupi Parlamentar i Partisë Demokratike në mënyrë unanime shprehu vullnetin e plotë dhe të sinqertë për të gjetur…” flasin 17 deputetë në emër të 44 deputetëve!
Për ti dhënë fund kësaj kronike për dështimin e paralajmëruar është dhe kërkesa që fushata zgjedhore të drejtohet nga kandidati për Kryetar Bashkie në çdo njësi vendore! Ta kërkon negociatori i Lulzim Bashës edhe ka kuptim, meqë nuk e din se çfarë është kandidimi dhe sipas Bashës ishte njeriu i Berishës, por kur e kërkon i zoti i punëse që na ka lodhë kokën nga viti 2011 duke na thënë se Berisha nuk ishte përzier në fushatë dhe ishte ai që i bëri të gjitha, atëherë nuk është e qartë pse është bërë kjo kërkesë! Apo, kot për provokim!
Po, pala tjetër! PD dhe Sali Berisha që akuzohet dhe shahet me libër shpie, çoi në negociata një njeri ndryshe, të përplasur për vota dhe gara elektorale, të cilit komunistët i vranë edhe komisionerin në mbrojtje të votës; Deri sa negociatat u zhvilluan, nuk i foli njeriu gjë, madje as për dokumentin e famshëm që u shpërnda në media nga Zyra e Lulzim Bashës.
Primaret, ndonëse u përfolën që në momentin që dolën nga goja e Sali Berishës, është vetëm një fakt që rrëzon çdo insinuatë mbi primaret që vazhdojnë e prodhohen nga impianti propagandistik i Edi Ramës: Ajo do të ruhet nga komisionerët e kandidatëve për kryetar bashkie!
Si?! Shikoni Bardh Spahinë i cili kishte kundër të 6 deputetët e PD që janë mbështetës të Lulzim Bashës, kandidatin e tyre për kryetar bashkie, kandidatin e PS për kryetar bashkie dhe gjithë makinerinë qeveritare të Edi Ramës!
Se si do të zhvillohet një garë në primare, jo vetëm në Tiranë ku marrin pjesë dy kandidatë me përvojë elektorale si Belind Këlliçi dhe Gert Bogdani, këtë e dinë fortë mirë edhe Lulzim Basha, me gojën e të cilit vazhdon e flet Gazment Bardhi!
Pse e vunë në dyshim këtë proces publikisht, Lulzim Basha me deputetët e tij, kur çdo kandidat i tyre për kryetar bashkie mund të kishte komisionerë, kjo nuk është pyetja sepse në zgjedhjet lokale të 6 Marsit, kandidatët e këtij grupi, pikërisht nuk kishin as komisionerë! Në fund, për të zgjidhur enigmën se çfarë kërkuan mbështetësit e Lulzim Bashës në negociatat për bashkimin e Partisë Demokratike për zgjedhjet lokale të 14 Majit me këto parakushte në një lum ku ujë ka për të gjithë, e sqaron një fjalë e urtë japoneze: “Njeriu i mençur do ta gjejë ujin në shkretëtirë, budallai pranë lumit do të vdes nga etja!”
