Të gjithë në rrezik, Sekretari i NATO-s: Rusia mund të godas Londrën, Romën ose Amsterdamin!

Jemi të gjithë në rrezik, tha Sekretari i Përgjithshëm i NATO-s, Mark Rutte, duke paralajmëruar se Rusia mund të godas Londrën, Romën ose Amsterdamin,

“Jemi të gjithë në rrezik; raketat më të përparuara të Rusisë me pesë herë shpejtësinë e zërit, mund të godasin Romën, Amsterdamin ose Londrën,” tha Mark Rutte në një intervistë për televizionin italian Tg1, duke theksuar rrezikun në rritje që përbën Rusia për sigurinë e vendeve europiane me kapacitetet teknologjike gjithnjë e më të avancuara që sot ka ushtria ruse.

Kjo situatë nuk është më një çështje vetëm e vendeve të krahut lindor të NATO-s, tha Rutte, por, një kërcënim për të gjithë aleancën:

“Do të thotë që të gjithë jemi në krahun lindor.”

Presidentin e Rusisë, Vladimir Putin, Sekretari i Përgjithshëm i NATO-s e përshkroi si kundërshtarin kryesor” dhe kërcënimin afatgjatë më serioz për sigurinë kolektive të Perëndimit.

“Kjo është arsyeja pse duhet të jemi jashtëzakonisht të kujdesshëm me Putinin. Ai është tashmë kundërshtari ynë kryesor, kërcënimi kryesor në planin afatgjatë nga pikëpamja e rritjes së aftësive të tij ushtarake,” tha Sekretari i Përgjithshëm i NATO-s, Mark Rutte duke përfunduar:

“Në fakt, ai mund të paraqesë një kërcënim të besueshëm kundër NATO-s, siç kanë theksuar disa kolegë evropianë.”

Presidenti i Rusisë, Vladimir Putin, i minimizon këto pretendime duke u bërë thirrje evropianëve të “qetësohen”, por paralajmëron: Moska do t’i përgjigjet militarizimit të BE-së. Pamja e dronëve të dyshimtë shkaktoi mbylljen e aeroportit të Munichut të Gjermanisë mbrëmë, i cili u rihap këtë mëngjes. Ndërkohë, Presidenti francez Emmanuel Macron takohet sot në Gjermani me kancelarin gjerman Friedrich Merz.