“Të hapen 100% listat”/ Reagimi, Rama: Pozitiv gjysmë hapi i LBPD, koalicionet s’ndryshojnë!

Kryeministri Edi Rama duke përshëndetur propozimin e kryetarit të Partisë Demokratike, Lulzim Basha, për hapjen e listave e hodhi poshtë kushtëzimin duke e bërë të qartë se për koalicionet parazgjedhore ato nuk do të ndalohen, thjesht do të standartizohen.

“Pozitiv gjysëm hapi i LBPD për hapjen e listave, që është thelbi i risive kushtetuese! Si e sa do hapen nga jo më pak se 75% në 100% kjo i takon diskutimeve pas 30 korrikut! Deri në 30 korrik ka rëndësi hapja e sotme e LBPD për listat, çka vetëm votimi 30 korriku e garanton,” tha Edi Rama në reagimin përmes rrjetit social Twitter duke e bërë të qartë dhe fatin e koalicioneve parazgjedhore:

“Sa për koalicionet parazgjedhore ato nuk do të ndalohen, thjesht do të standartizohen si kudo në Europë, po edhe kjo do të shkruhet e votohet pas 30 korrikut,kështu që për sot i vetmi ndryshim është hapja e LBPD ndaj risisë kushtetuese që do të sjellim në 30 korrik!Mjaft pozitive!”

Ndryshe, pas takimit me Aleatët sot kryetari i Partisë Demokratike, Lulzim Basha, bëri të ditur se qëndrimi i Opozitës së Bashkuar është të hapen 100 për qind listat me kushtin që koalicionet dhe përllogaritja e mandateve të vazhdojë ashtu siç është.