Të pagjeturit, rinisin gërmimet në veri të Mitrovicës…

Gërmimet e ndërprera para dy vjetësh, e që kanë vazhduar sot në varrezat e muslimanëve në veri të Mitrovicës për trupat e shqiptarëve të vrarë gjatë luftës së fundit në Kosovë, nuk kanë zbardhur mbetjet mortore të viktimës që është kërkuar.

Kështu ka bërë të ditur për KosovaPress, Shefi i zyrës së komisionit për persona të pagjetur, Kushtrim Gara, duke saktësuar se supozohet se në këtë lokacion gjenden një numër i viktimave të luftës, ndërsa sot është hasur në disa mbetje mortore që janë jashtë interesit të ekspertëve mjeko-ligjor.

Kryetari i Shoqatës “Zëri i prindërve” dhe udhëheqësi i Qendrës Burimore për Persona të Zhdukur, Bajram Çerkini, ka hedhur akuza për dinamikën e gërmimeve, duke thënë se nëse vazhdohet kështu me këtë dinamikë, gërmimet do të zgjasin edhe 20 vjet.

“Në këtë varrezë sot është kërkuar vetëm një person, ndërsa në bazë të dokumentacionit që kemi, këtu duhet të jenë së paku 12 persona, dhe nëse puna vazhdon me këtë dinamikë gërmimet do të zgjasin 20 vjet,” tha Bajram Çerkini.

Kushtrim Gara tha se për sot punimet janë ndërprerë ndërsa do të vazhdojnë pas disa konsultave të nevojshme dhe pasi të ndiqen disa procedura të prokurorisë. Ai me këtë rast i ka bërë thirrje bashkësisë ndërkombëtare për një presion më të madh ndaj institucioneve të Serbisë, pasi siç u shpreh ai, Serbia duhet të jetë më bashkëpunuese në këtë drejtim.

Ndryshe, gërmimet e sotme në varrezat e muslimanëve në veri të Mitrovicës janë bërë nga delegacioni qeveritar i Kosovës së bashku me delegacionin e Serbisë.