Të paktën shtatë të vdekur nga stuhia e fuqishme në SHBA
Një stuhi e madhe, që shkaktoi erëra të fuqishme dhe tornado goditi mbarë jugun e Shteteve të Bashkuara, duke lënë të vdekur të paktën shtatë persona në Georgia dhe Alabama.
Në këto dy shtete amerikane është raportuar për dëme materiale.
Autoritetet, raprton RFE, thanë se gjatë ditës së sotme mund të kenë një pamje më të qartë të madhësisë së dëmit të shkaktuar nga kjo stuhi dhe mund të ketë edhe më shumë viktima, pasi pritet të përmirësohen kushtet atmosferike.
Stuhia e madhe nisi mbrëmjen e të enjtes dhe dhjetëra mijëra amerikanë mbetën pa energji elektrike në Georgia dhe Alabama.
Në Selma të Alabamës, autoritetet e qytetit mbajtën mbledhje për të shpallur gjendje të jashtëzakonshme.
Kryetari i qytetit, James Perkins, tha se nuk është raportuar për viktima, por disa persona janë plagosur rëndë.
Ai tha se ekipet po punojnë për të vlerësuar dëmin e shkaktuar dhe zyrtarët shpresojnë që të arrijnë të marrin pamje nga lart.
“Kemi shumë linja elektrike të shkatërruara. Ka shumë dëme në rrugë”, tha ai.
Gjashtë nga viktimat u regjistruan në qarkun Autauga, që gjendet 66 kilometra në verilindje të Selmës, ku vlerësohet se 40 shtëpi janë dëmtuar ose janë shkatërruar nga një tornado që goditi këtë zonë, tha Ernie Baggett, drejtor për menaxhimin e emergjencave në këtë qark.
Të paktën 12 persona janë lënduar dhe janë dërguar për trajtim mjekësor, tha Baggett prë Associated Press.
“Kjo është stuhia më e keqe që kam parë në këtë shtet”, tha Baggett, duke iu referuar dëmeve të shkaktuara.
Në Georgia, një pasagjer vdiq kur një pemë goditi makinën me të cilën po udhëtonte në Jackson, thanë autoritetet.
Sipas Shërbimit Kombëtar të Motit, janë regjistruar 33 tornado që kanë goditur në Mississippi, Alabama, Georgia, Tennessee, Kentkucky dhe në Carolinën e Jugut dhe të Veriut.
Për shkak të stuhisë, rreth 40.000 amerikanë mbetën pa rrymë të enjten mbrëma në Alabama, ndërkaq 86.000 në Georgia.
Në të paktën gjashtë qarqe në Georgia, raporton RFE mësimi është anuluar për të premten.
Stuhia që filloi mbrëmjen e së enjtes u shkaktua nga tri faktorë: cikli natyror i motit La Nina, ngrohja e Gjirit të Meksikës për shkak të ndryshimeve klimatike dhe tornadot që u shkaktuan nga perëndimi në lindje të vendit, tha profesori i meteorologjisë, Victor Gensini.
