Të rinjtë në PD, Basha: Me Edi Ramën s’ka BE! Po na kthen 10 vite pas…

Kryetari i Partisë Demokratike, Lulzim Basha, në një takim me të rinjtë e Farkës, Petrelës, Bërzhitës dhe Krabës, të cilët i janë bashkuar PD-së dhe që përkoi dhe me përfundimin e Samitit të Berlinit u shpreh se  fatkeqësisht se edhe në këtë qershor, Shqipërisë nuk do t’i hapen negociatat sepse si në fushën e ekonomisë, ashtu ddhe në fushën e shtetit të së drejtës, ka hapa mbrapa.

 “Dua tju falënderoj për këtë javë aksioni politik të paprecedentë, me shpirt dhe me zemër. Këtu nuk ka punë përgjysmë, ose bëhet ose nuk bëhet fare. Unë e di që ju jeni njerëz qytetarë dhe familjarë. Këto janë 6 vite të vështira për Shqipërinë, për rininë, për fëmijët, për arsimin, për shëndetësinë. Ja ku jemi sot, një ditë e veçantë për Shqipërinë dhe të ardhmen e saj evropiane. Se sa e drejtë dhe vendimtare është rruga që kemi ndjekur. Për një qeveri të vërtetë që e lidh fatin e vetë me njerëzit, për një drejtësi me një standard dhe jo me dy. Ashtu siç kishim paralajmëruar nuk ka as zhvillim, as mirëqenie dhe as integrim,” tha Lulzim Basha duke u u shprehur qartë se me më të korruptuarin, Edi Ramën, jo vetëm që nuk bën asnjë hap përpara drejt BE por po na kthen 10 vite pas duke na kthyer vizat:

“Nuk mund të ketë hapje negociatash për një vend ku zgjedhjet janë vjedhur dhe kriminelët nuk dënohen. Këto nuk janë standarde evropiane, por afrikane. Me më të korruptuarin, Edi Ramën, jo vetëm që nuk bën asnjë hap përpara drejt BE por po na kthen 10 vite pas duke na kthyer vizat. Fatkeqësisht edhe në këtë qershor, Shqipërisë nuk do t’i hapen negociatat sepse edhe në fushën e ekonomisë, edhe në fushën e shtetit të së drejtës, ka hapa mbrapa.”

Edhe me këtë rast Kryetari i Partisë Demokratike përsëriti se largimi i Ramës nga posti i kryeministrit është i panegociueshëm dhe cila është rruga e vetme:

“Largimi i Ramës është i panegociueshëm, qeveria transitore është rruga e vetme. Nuk mund të ishim më pjesë e teatrit të kukullave. Në cilin vend të botës parlamenti voton ligje që ti marrë lekët e shumicës e t’ia japë pakicës. Në cilin vend të botës nuk rriten rrogat e mjekëve dhe infermierëve, këto lekë shkojnë dhe bëhen koncesione. Madje në cilin vend të Ballkanit ndodh që shteti të mos parashikojë subvencione për fermerin dhe të ketë një politikë kaq çnjerëzore ndaj fermerit. Sot të punosh tokën në Shqipëri nuk është më bekim, por mallkim.”

Djegja e mandateve ka qenë vendimi më demokratik i Partisë Demokratike dhe aleatëve të saj, vazhdon të jetë i bindur Kryetari i PD, Lulzim Basha, ashtu siç është i sigurt në fitore ndërsa përfundon:

“Asgjë nuk na ndal, asnjë imunitet, asnjë privilegj. Ballë për ballë me të keqen. Jemi të sigurtë se jemi shumica politike dhe morale.”