Të rinjtë po ikin, Basha: Me Edi Ramën promovohen ata që kanë rekorde kriminale!

Një në çdo 3 persona që ikën nga vendi ynë është i ri apo e re, ndërsa Shqipëria është ndër vendet me largimin më të madh të trurit në rajon, thekson i shqetësuar Lulzim Basha duke ju referuar raportit më të fundit të “Gallup” ndërsa konstaton se me Edi Ramën promovohen ata që kanë rekorde kriminale.

“Sot shqiptarët largohen sepse kanë më pak mundësi për arsimim, dhe ata që arsimohen më pak mundësi për punësim. Me Edi Ramën janë promovuar ata që kanë rekorde kriminale dhe jo të rinjtë e mirëshkolluar,” tha Lulzim Basha në reagimin e tij duke shtuar se taksat e larta të qeverisë Rama këto 7 vjet kanë marrë më shumë para nga xhepat e të rinjve se çdo qeveri tjetër, teksa korrupsioni nuk lë të ecin përpara ata që janë profesionistë të ndershëm.

“Largimi i të rinjve është një plagë tjetër e madhe për Shqipërinë. Ne do të bëjmë gjithçka për t’i mbajtur në vendin tonë të rinjtë si krahun më vital të punës. Plani ynë do të mbështesë iniciativat e të rinjve, kushtet e duhura për punësimin dhe sipërmarrjet e tyre. Ata kanë plot ide, pasion dhe energjinë e duhur për t’i dhënë një hov të madh pozitiv zhvillimit të vendit,” premton Kryetari i Partisë Demokratike duke reaguar pas raportit të “Gallup” përmes rrjetit social Facebook duke shtuar se PD do të çlirojë tregun nga monopolet që ekonomia jonë të marrë frymë lirisht: me taksa te ulëta, investime në teknologji, dhe një politikë fiskale që mbështet punën.

Plani ynë do të krijojë hapësira që kushdo që dëshiron të arsimohet e të punësohet ta bëjë këtë në vendin e vet, zotohet në fund Kryetari i Partisë Demokratike, Lulzim Basha, duke përfunduar:

“Shqiptarët duan një qeveri që kujdeset për njerëzit dhe që ju bëhet atyre krah, një qeveri që ofron mundësi dhe punë për djemtë dhe vajzat tona!”