Të sanksionohet ndërkombëtarësisht, Kurti: Ndryshe, Serbia do ta përsërisë krimin!
Serbia të sanksionohet ndërkombëtarësisht dhe nëse kalon e pandëshkuar, ajo do ta përsërisë krimin, ishte thirrja që Kryeministri i Kosovës, Albin Kurti, bëri sot në seancë plenare të Parlamentit, ndërsa foli për sulmin terrorist të së dielës së 24 shtatorit në Banjskë të Zveçanit ku mbeti i vrarë pjesëtari i Policisë së Kosovës, rreshteri Afrim Bunjaku.
“Të dielën përjetuam një sulm agresor të bandave kriminale e terroriste të Serbisë, jo vetëm ndaj Policisë, por ndaj shtetit, rendit të Republikës sonë. Ishte ditë e rëndë për vendin tonë. Policisë do t’i mungojë një pjesëtar i përkushtuar i saj. Por vrasja e tij u kthye në angazhim të shtuar për t’i luftuar bandat terroriste dhe në fitore të betejës ndaj tyre. Terroristët ose janë vrarë, ose janë arrestuar, ose janë në ndjekje pasi ikën. Afrimi u vra në pritë gjatë natës.
Në zbardhje të ditës, u pa që asnjë bandë nuk mund ta mposhtë policinë tonë. Sulmi i armatosur cenoi integritetin territorial, sovranitetin dhe sigurinë kombëtare. Sulmuesit që ikën duhet të ekstradohen, të dorëzohen në organet tona. Organizatat ‘Mbrojtja Civile’ dhe ‘Brigada Veriore’ duhet të shpallen terroriste edhe nga shtetet tona aleate, siç bëri Qeveria,” tha Kryeministri Albin Kurti i prerë:
“Për këtë akt, Serbia duhet të sanksionohet ndërkombëtarësisht. Nëse kalon e pandëshkuar, ajo do ta përsërisë krimin. Armatimi ushtarak që i kishin profesionistët serbë që sulmuan në Banjskë janë që të gjitha nga Serbia dhe të freskëta në kohë.
Serbia ua dha pajisjet ushtarake, ua kreu trajnimet luftarake. Kjo nuk ka filluar të dielën e 24 shtatorit. Na i patën rrëmbyer edhe tre policë në Leposaviç. Kishim tre javë të barrikadave në dhjetor të vitit të kaluar. Sulmet në Zveçan që lan shumë të plagosur. E gjithë kjo tregon se kishim një kronikë të paralajmëruar për vrasjen e heroit tonë, Afrim Bunjakut,” tha Kryeministri Albin Kurti i bindur se lufta ndaj krimit të Serbisë, do të triumfojë me fitoren e Kosovës.
Pas fjalës së Kryeministrit Albin Kurti, Kryetari i Parlamentit, Glauk Konjufca, ftoi grupet parlamentare që, së bashku, të përfshijnë të gjitha pikat që i konsiderojnë që të jenë pjesë e Rezolutës e cila u mbështet nga të gjitha grupet parlamentar dhe dënon sulmin terrorist në Banjskë.
Ndryshe, seanca e sotme plenare e Parlamentit të Kosovës ka nisur me një minutë heshtje në nderim të rreshterit të Policisë së Kosovës, Afrim Bunjaku, i cili u vra mëngjesin e së dielës në Banjskë nga terroristët serbë.
