Të vetme nuk mund t’ia dalim…

nga Orjola Pampuri

Në një ditë nuk mund të arrijmë gjithçka, por në një ditë mund të ndërmarrim iniciativa të rëndësishme, për t’i vënë në zbatim gjatë një viti, apo vendime që mund të ndryshojnë të ardhmen e vajzave dhe grave.

Të vetme nuk mund t’ia dalim, pa force shpirtërore, kurajo dhe këmbëngulje, nuk mund të fitojmë të drejtat tona.

Por ne mund të frymëzohemi e të marrim kurajo dhe nga ato gra dhe vajza që arritën t’ia dalin e të jenë të sukseshme, në profesione të ndryshme, e në jetë.

Një grua duhet të gjejë forcë të ringrihet, edhe nëse e nëpërkëmbin, edhe nëse tentojnë ta nënshtrojnë.

Të gjitha ne gratë dhe vajzat, duhet të punojmë çdo ditë, duhet të jemi bashkë, për të hedhur hapa të sigurtë, në një botë ku ende dëgjojmë shifra të larta të dhunës ndaj gruas.

E të mendosh që gruaja është burimi i jetës, i dashurisë, i përkushtimit.

Është nëna që nuk lodhet kurrë, e di të falë veç ngrohtësi, Eshtë bashkëshortja që duron aq shumë, e ndonjëherë lotët i fsheh, dhe gjen fuqi t’i buzëqeshë fëmijës së saj.

Gruaja i jep ngjyra kësaj bote, i jep formë, i jep kuptim jetës.

Fuqizimi i gruas, respekti dhe dashuria ndaj saj duhet të jetë detyrim dhe prioritet për të gjithë ne, për të gjithë ju.

Gëzuar 8 Marsin për të gjithë ju zonja të nderuara.