Të zgjatet mandati i vettingut, Yuri Kim: Të zbatohen rekomandimet e OSBE/ODIHR

Pas takimit me Ambasadorin e OSBE në Tiranë, Del Monaco, Ambasadorja e SHBA në Tiranë, Yuri Kim, tha se Parlamenti duhet të miratojë zgjatjen e mandatit të organeve të vettingut.

“U takova me Ambasadorin e OSBE në Shqipëri Del Monaco sot për të diskutuar një sërë çështjesh. Ramë dakord që, në përputhje me rekomandimin e ONM-së, Parlamenti duhet të miratojë reformën kushtetuese për të zgjatur mandatin e vettingut,” tha Ambasadorja amerikane Yuri Kim përmes rrjetit social Twitter duke kërkuar nga palët që të veprojnë sipas rekomandimeve të OSBE/ ODIHR.

“Gjithashtu jemi dakord që autoritetet dhe palët duhet të veprojnë sipas rekomandimeve të OSBE/ODIHR mbi zgjedhjet!”

Ndryshe, thirrja e Ambasadores së SHBA, Yuri Kim, drejtuar Parlamentit vjen pas deklaratës së Kryeministrit Edi Rama i cili u shpreh qartë se për këtë çështje nuk negocion me opozitën sepse zgjatja e mandatit të vettingut, thjeshtë, duhet të votohet!