Të zgjedhurit vendorë të PD-së, Berisha: Motivim, për t’u përballur me regjimin e Edi Ramës

Të zgjedhurit vendorë të Partisë Demokratike janë misionarë sepse ata rivendosën pluralizmin politik, tha Kryetari i PD, Sali Berisha, në Asamblenë e Përgjithshme të të Zgjedhurve Vendorë Demokratë duke saktësuar se sot të zgjedhurit vendorë duhet të motivojnë armatën idealiste për t’u përballur me regjimin e Edi Ramës.

Kryetari i Partisë Demokratike këshilloi të zgjedhurit vendor që të bashkëpunojnë edhe me qeverinë, por të denoncojnë çdo diskriminim të saj ndërsa paralajmëroj rikrijimin e Shoqatës së të Zgjedhurve vendorë nga të zgjedhurit demokratë.

“Së pari, u përshëndes ju shumë përzemërsisht, përshëndes të gjithë të zgjedhurit vendorë të opozitës, kudo që janë, mbështetësit, simpatizantët tuaj dhe theksoj se roli juaj është i një rëndësie të jashtëzakonshme.

Roli i të zgjedhurve vendorë, sot, pas asgjësimit të pluralizmit politik në qeverisjen vendore, në një nga vendimet më antidemokratike që PD mori në vitin 2019, pas reformës territoriale antidemokratike të Edi Ramës në vitin 2014, reformë e cila krijoi pabarazitë më të mëdha në ndarjen territoriale, mjafton t’u kujtoj se rrethe me 1 milion banorë kanë vetëm 4 bashki, ndërkohë që rrethe me 120 mijë banorë, kanë 7 bashki dhe kjo me qëllimin e vetëm se si të grabiten më shumë mandate, duke mos respektuar asnjë nga kriteret mbi të cilat bazohet ndarja territoriale e një vendi.

Kjo pabarazi ekstreme që vendosi Rama me reformën territoriale, u pasua me largimin e madh të të zgjedhurve vendorë nga qytetarët. Qindra të zgjedhur vendorë u zëvendësuan me të emëruar, militantë të partisë, çka e politizoi gjer në palcë këtë pushtet dhe largoi shërbimet nga qytetari.

Largoi shërbimet nga qytetari në zonat ku ishin më të vështira për t’u siguruar. Faktikisht, i largoi ato nga Shqipëria rurale, e cila përbënte së paku 45 përqind të Shqipërisë.

Në reformën e tij territoriale, Edi Rama pretendoi se do të zvogëlojë punonjësit e qeverisjes vendore, në mënyrë që kjo qeverisje të rëndojë më pak mbi shpatullat e qytetarëve shqiptarë. E vërteta është se ndodhi e kundërta. Qeverisja vendore u dyfishua në numër.

Ndodhi një përqendrim total në qendrat e qyteteve, që kanë marrë gjer më sot 2.2 miliardë euro. 2.2 miliardë euro janë vjedhur bashkë me qeverinë nga 5 kompani gjithsej, se të tjerat nuk dinin të shtronin rasa guri.

Por, do të jemi realistë, goditjen e mëshirës, qeverisë vendore ia dha bojkoti i PD, e cila lëshoi çdo pozicion dhe bëri të mundur vendosjen e plotë totale të monizmit në qeverisjen vendore.

Në këtë kontekst, të zgjedhurit vendorë të PD-së, të opozitës, janë misionarë sepse ata rivendosën pas vitit 1992, kur u bënë zgjedhjet e para për qeverinë vendore, rivendosën pluralizmin politik.
Rivendosja e pluralizmit kaloi në një farsë të paimagjinueshme,” tha Sali Berisha duke mos harruar Librin e zi të farsës elektorale, që sipas tij, duhet t’i shërbejë çdo opozitari, çdo qytetari për të njohur të vërtetën mbi procesin themelor të një vendi që janë zgjedhjet.

“Dhe ajo ju garantoj se nuk është e plotë, se ajo nuk trajton proceset e nëndheshme të një shteti mafioz, por vetëm ato të dokumentuara me dokumente zyrtare, janë fotografuar, janë regjistruar nga qytetarët, aktivistët e opozitës.

Është detyra juaj, detyra e të gjithë të zgjedhurve vendorë, atyre që kandiduan, që të angazhohen në një përpjekje të madhe me 600 mijë idealistë opozitarë, të cilët pavarësisht nga pabarazia ekstreme, pavarësisht nga kërcënimet kriminale të një krim-ministri, që zotohej dhe betohej se po votove për kandidatin tjetër, nuk do marrësh një qindarkë, pavarësisht me transformimin e administratës dhe trupës së shërbimit civil në një polici politike elektorale, ata nuk u dorëzuan dhe qëndruan të pamposhtur dhe votuan kundër qeverisë, votuan për opozitën.

Është në detyrën tonë, sot që kemi gjithçka të qartë në dritën e diellit, të motivojë këtë armatë idealiste për t’u përballur me regjimin e Edi Ramës. Ky është armik i votës, ky nuk e lejon votën.
Ky ka krijuar modele të blerjes publike të votës, po e lëmë të fshehtën. Të bazuar në bandat, vrasësit, kriminelët, me të cilët ai grabit në tërësi mandatet që përcakton,” tha lideri i opozitës duke rikujtuar të zgjedhurit vendor se misioni i tyre është transparenca!

“Detyrat tuaja janë të shumta, unë theksova se është një mision i rivendosjes së pluralizmit të vërtetë në qeverisjen vendore.

Së pari, duhet të fillojmë me transparencën.

Errësira, dhe vjedhja në errësirë, është tipari më kryesor i qeverisjes së sotme.

Më abuziv se kushdo tjetër është Edi Rama.

Erion Veliaj është i dyti në radhë. Transparencë është jetike. Është unike në botë. Një kryetar bashkie që thotë se ka mbjellë 1 milion pemë. Ka vjedhur shumën për 1 milion fidanë.

Vetëm dje, u hiqte fondet arsimit dhe i kalonte te djegësi i tij.

Këta janë zinxhir. Kriteri i tyre më kryesor është hajdutëria, ndaj kudo që jeni, në këshillat bashkiakë, do të krijoni komisione hetimore, nuk do të pranoni kurrë mbledhje me dyer të mbyllura si në shpellat e mafies. Ju jeni parlamentarë vendorë.

Asnjë dallim përveç territorit nuk ka në krahasim me parlamentin qendror.

Do bëni gjithçka, që të qëndroni me të gjithë pushtetin tuaj.

Mburret kreu i bashkisë së Tiranës, se çmimet në Tiranë kanë arritur të tretat në Europë pas Mynihut e Parisit, në një kohë kur qytetarët i kanë ata mollë e ndaluar.

Tani kanë shpikur çmimet e referencës, 54 përqind rrit çmimin me çmimet e referencës.

Këta nuk kanë interes tjetër përveç klaneve të drogës që përfaqësojnë.”

Në fund Kryetari i Partisë Demokratike tha se të zgjedhurit vendorë duhet të ashkëpunojnë edhe me qeverinë, por të denoncojnë çdo diskriminim të saj:

“Është shumë e rëndësishme që të bëjmë gjithçka me votën tonë, të kundërshtojmë rritjen e taksave.
Ju ftoj gjithashtu, edhe të zgjedhurit tanë të nderuar, të përparësoni me të gjithë pushtetin që keni, arsimin.
Bashkitë tona duhet të bëjnë gjithçka që kanë mundësi, me akordim bursash për të varfrit, për ta pasur arsimin si përparësi kryesore.
Të kontrolloni ndihmën ekonomike. Të bëni gjithçka për të regjistruar qytetarët që e kanë të domosdoshme ndihmën ekonomike dhe që nuk e marrin.
Ne do bëjmë betejë të fuqishme për minimumin jetik. Vendosja e minimumit jetik është e një rëndësie vendimtare.
Në përputhje me ligjin, ju duhet të bashkëpunoni me qeverinë qendrore, në interes të zgjedhësve tuaj. Por do denonconi çdo diskriminim të qeverisë vendore ndaj bashkisë tuaj dhe qytetarëve tuaj.
Bashkëpunimi duhet të zbatohet mbi projekte. Ndaj, ato fonde që keni, i përqendroni në projekte sidomos nga institucionet ndërkombëtare, se ky do bëjë një diskriminim ndaj jush.
Duhet të jeni shumë aktiv në bashkëpunimin ndërkombëtar, në interesin më të mirë të qytetarëve që ju drejtoni,” tha Kryetari i Partisë Demokratike, Sali Berisha, duke paralajmëruar rikrijimin e Shoqatës së të Zgjedhurve vendorë ndërsa përfundoi:

“Sot, ne rikrijojmë këtu Shoqatën e të Zgjedhurve. E ligjshme kjo!

PD është themeluese e pushtetit pluralist vendor, themeluese e Shoqatës së të Zgjedhurve Vendorë. Ajo bëri gjithçka për respektimin e Kartës së Kongresit të Autonomisë Lokale dhe është e vendosur të qëndrojë mbi ato parime mbi të cilat është e ndërtuar Europa e rajoneve.

Kështu që shoqata juaj do ketë si detyrë kryesore mbrojtjen, konsolidimin e standardeve të përcaktuar në Kartën e Kongresit të Autonomisë Lokale.

Nuk mundet që shqiptarët të përfaqësohen nga një shoqatë e kryesuar nga një person si Erion Veliaj, vjedhja e mashtrimet e të cilit kanë kufi qiellin.

Ndaj duhet të ketë një shoqatë e të zgjedhurve demokratë vendorë, me përkushtimin më të madh për t’iu përmbajtur parimeve të qeverisjes demokratike vendore.

Edhe njëherë iu përshëndet për punën që kemi bërë dhe do bëni dhe ju uroj suksese edhe në këtë fushatë, që është e mirëpritur jo vetëm në Shqipëri, por edhe nga Kongresi i Autoriteteve Lokale dhe Rajonale në Europë dhe shoqatat simotra.”