Teatri dhe Bixhozi/ Ja pse Edi Ramës nuk i duhet Teatri…

Askush nuk kishte iluzion se sot nuk do të kalojnë Ligjet kundër Bixhozit dhe Teatrit, por askush nuk e ka menduar se kryeministri Edi Rama do ta shndërroj Parlamentin e Shqipërisë në një Teatër të shëmtuar Kombëtar.

Fatkeqësisht kjo ndodhi sot kur po vendosej për rrëzimin e një Teatri ndërkohë qytetarët shqiptarë po dëgjonin se një i dënuar nuk mund të ketë një pikë basti, por nëse është mik i Taulant Ballës, ishte i dënuar  dhe quhet Mond Bego, jo vetëm që mund të merret me biznes por mund të marr tendera nga pushteti i Edi Ramës. Dhe jo vetëm kaq!

Kur dëshmitari kyç i rastit Babale, Fred Alizoti flet me një eksponentë të PD, numri i tij i celularit bëhet publik dhe shoqërohet me emrin e pronarit, ndërkohë kur një kriminel i burgosur, siç thuhet, kërcënon kryetarin e Komisionit të Ekonomisë dhe deputetin e PS, si numri ashtu edhe emri i kriminelit mbeten me shumë të panjohura.

Akti i I-rë: SMS-të kërcënuese ndaj deputetëve

Kryeministri Edi Rama nga foltorja e parlamenti na u bë trim i madh, dhe duke i dhënë përgjigje personave, që thotë se
kanë kërcënuar deputetët e Komisionit të Ekonomisë, të cilët
votuan amendamentet për ligjin e lojërave të fatit, thekson se ata do të marrin përgjigjen e merituar me mbylljen e llotove dhe kazinove si dhe me përgjigjen ligjore.

“Respekt për të gjithë ata që kaluan një periudhë stresi të veçante me shumë sms të llojeve të ndryshme dhe atyre që i kanë çuar ato sms që i kanë porositur nga jashtë apo brenda burgut iu jap një përgjigje tani me ndalimin e bixhozit dhe në vijim do u japim përgjigje të njëpasnjëshme, siç nuk i kanë parë në ëndrrën e tyre më të keqe,“ u shpreh Rama duke mos dënjuar se për cfarë persona bëhet fjalë, ashtu sikur se edhe deputeti i PS-së, Erjon Braçe i cii lexoi një mesazh që i kishte ardhur nga persona të panjohur, ku thuhej se me mbylljen e lojërave të fatit po i hiqnin bukën e fëmijëve dhe se tashmë ata do merreshin me fëmijët e deputetëve.

Dhe, Taulant Balla që ishte prezent, nuk nxitoi sikur se në rastin e emisionit Opinion, kur u publikuan përgjimet me Fred Alizotin të na thotë se filan numri i celularit është i Sali Lushajt. Madje, bastardimi bëhet edhe më më i madh kur thuhet se thirrjet vinin nga burgu!

Akti i II-të: Skedat penale të pronarëve të kompanive të basteve

Pasi u lodhë duke sharë opzoitën dhe Lulzim Bashën, kryeministri Edi Rama tha se shumica e pronarëve të lojërave të fatit janë me
precedentë.

“I dënuar për pengmarrje, plagosje, shkatërrim prone
dhe prodhim të lëndëve plasëse, për trafik ndërkombëtar droge, për shfrytëzim prostitucioni. Këto janë skedat penale të pronarëve të kompanive të basteve, personazhe të një bote që pak ka pasur që të bëjë me ligjshmërinë dhe mbarëvajtjen. Biznesi u transformua në hapësirën e pa kufijshme deri në 2013 dhe tamam sikur e theksoi kryetari i komisionit të Ekonomisë dhe financave është e pavërtetë se pas zhvillimit të operacionit Fundi i Marrëzisë, marrëzia është zhvilluar ende më,” tha Edi Rama duke harruar se nuk është duke folur me pasqyrën por në një seancë plenare e cila transmetohet drejtëpërdrejtë në TV, dhe shikohet nga qytetarët që kanë parë ish-të denuar që u përzgjodhën deputetë edhe pse të skeduar pikërisht si këta pronar të pikave të basteve; Janë po këta qytetarë që kanë dëgjuar kryetarin e Grupit Parlamentar të PS, Taulant Balla i cili pas publikimit të dokumentave mbi bashkëudhëtarin e tij trafikant të dënuar ndërkombëtar për drogë, ai përveç se e pranoj se e ka mik, tha se kemi të bëjmë me një ish-të dënuar i cili duhet të jetoj, i është kthyer jetës normale dhe është baba i fëmijëve të shkëlqyeshëm. Dhe, kur për të njejtin person u zbuluan dokumente se kishte marrë edhe tendera, ai foli për një biznesmen të suksesshëm e për të kaluarën e tij, ishte e kaluar.

Duke gënjyer publikisht se këtë vendim e mbështesin 92% e grave shqiptare, kur në zgjedhje nuk i dalin as 50 % prej tyre, broçkullisi pa fund mbi seritë turke dhe iu kthye edhe atyre pak analistëve që nuk mendojnë si kryeministri:

“Ca po bëjnë këta, se janë dhe analistët me gjyslykët poshtë dhe sytë lartë, ça po bëjmë ne? Po bëjmë luftë frontale me të këqijat e
rrënjëzuara thellë në këtë shoqëri që janë të vështira për tu mundur sa hap e mbyll sytë. Dhe meqë krimi lulëzoi në kohën time dhe të Braçes, timen në fakt se Erjoni ka pasur shumë kohë, më thoni një emër, nga këta të serisë narkobabale që u krijua dhe u bë i famshëm në botën e paligjshmërisë me ardhjen në qeveri të PS,” pyeti kryeministri edhe pse që të gjithë kriminelët e përfolur deri më sot për pesë vjet, me përjashtim të Babales, dolën se janë mik ekskluziv të socialistëve.

Drama mbaroi, ndërkohë fadromat u ndezën jo për të shkatërruar pikat e basteve, sepse ato u mbyllën me urdhër të atyre që i lejuan dhe janë në pushtet, por pë të shkatërruar Teatrin e vetëm Kombëtar, të cilit i kanë mbetur edhe 15 ditë jetë.

Prozhektorët u fikën, terrë gjithandej, koha është e maskarenjëve të cilët pasi ta rrjepin mirë e mirë atëdheun, do  t’ja lënë në dorë shqiptarëve!