“Teatri Kombëtar”, Basha: Hapja e gropës së Teatrit, është gropë për Edi Ramën!

Me artistët dhe qytetarët e Tiranës në mbrojtje të Teatrit Kombëtar sot u bashkua edhe Kryetari i Partisë Demokratike, Lulzim Basha, duke e konsideruar një projekt kriminal, me anë të cilit Edi Rama kërkon të grabisë miliona euro, bashkë me klientët e tij.

“Gjithçka që po zhvillohet këtu ka vetëm një qëllim: grabitjen e kësaj toke, zhvillimin e një projekti mbi 200 milion euro për të pastruar paratë e drogës me një arkitekt të dënuar në Itali, që është arkitekti klient i Edi Ramës”

Pra, tha Lulzim Basha, është një skemë e pastër mafioze për t’i rrëmbyer kryeqytetit dhe gjithë Shqipërisë, Teatrin Kombëtar, për të pasuruar Edi Ramën dhe një grusht hajdutësh që kanë marrë përsipër prishjen e Teatrit Kombëtar dhe pastrimin e parave të drogës dhe paratë e Edi Ramës.

Me këtë rast Kryetari i Partisë Demokratike sqaroi prezencën e tij dhe të deputetëve demokratë:

“Betejën po e bëjnë artistët dhe Aleanca për Teatrin, ne jemi në mbështetje të tyre dhe do të jemi në mbështetje me të gjitha format dhe mjetet. Çdo përpjekje për të hapur gropën e Teatrit, do të kthehet në gropën e Ramës,” tha lideri i opozitës Lulzim Basha duke garantuar Aleancën për Teatrin për mbështetjen opozitare:

“Opozita ka qenë dhe do të jetë këtu, siç po e shikoni. Çështja është që para çdo shqiptari po duket qartë se nuk kemi qeveri, por një bandë dhe duhet të kuptojnë se kjo që po ndodh këtu mund të ndodhë në çdo shtëpi.”