“Teatri Kombëtar”/ Çahet kordoni policor, Aleanca futet në Teatër…

Pas tensioneve dhe përplasjeve të forta dhe fizike, Aleanca për Mbrojtjen e Teatrit tashmë e mbështetur edhe nga opozita arritën të çajnë kordonin policor dhe kanë hyrë brenda godinës së Teatrit Kombëtar duke u futur përfundimisht në sallën e Teatrit.

Së bashku me Aleancën është dhe Kryetari i Partisë Demokratike, Lulzim Basha:

“Brenda Teatrit Kombëtar ku Banda e Edi Ramës kishte nisur çmontimin. Aleanca për Teatrin dhe qytetarët i larguan dhe u futën brenda. Krenar për forcën e qytetarëve të bashkuar,” thekson Lulzim Basha përmes një reagimi në rrjetin social Facebook duke garantuar mbështetjen e opozitës.

Në sallë kanë performuar aktorë të shumtë ndërsa regjisori Edmond Budina duke u përkulur puthi skenën dhe me shumë emocione u shprehë:

“S’ka skenë më të bukur në botë se kjo. Kjo është vlera jonë, që po e ruajmë nga vjedhja. Padiskutim që kemi nevojë për në Teatër të ri, ta ndërtojmë në një vend tjetër kudo që të jetë, jo një por disa teatro. T’u japim dinjitet aktorëve e spektatorëve. Gjesti i sotëm i qytetarëve tregon që ky Teatër është i qytetarëve, askush nuk mund ta shkatërrojë këtë tempull, Ky vend është i shenjtë, lëvizin shpirtrat e aktorëve që kanë dhënë jetën e shpirtin në këtë Teatër.”