Teatri nuk vdes! Sot protestë në 17:30

Aleanca për Mbrojtjen e Teatrit sot pranë Teatrit Kombëtar prej të cilit kanë ngelur vetëm rrënoja organizon protestën e radhës me fillim në orën 17:30.

Në emër të Opozitës së Bashkuar, Kryetari i Partisë Demokratike, Lulzim Basha, tha se do të mbështesë protestën e Aleancës për Teatrin, duke e bërë të qartë se shkatërrimi i Teatrit nuk është fundi i kulturës dhe guximit të shqiptarëve, por fillimi i fundit të tiranisë që Rama ka luajtur me qytetarët e Shqipërisë.

“PD do të mbështesë të gjitha protestat e Aleancës për Teatrin, këtu në Tiranë dhe kudo për të qenë në krah të qytetarëve, te protestat. Partia Demokratike do të jetë në krah të artistëve. Shpresa e Edi Ramës se me dhunë do të shuajë zërat e njerëzve të lirë e dëshirën e shqiptarëve për ndryshim ka marrë fund.

Shkatërrimi i Teatrit nuk është fundi i kulturës dhe guximit të shqiptarëve, por fillimi i fundit të tiranisë që Rama ka luajtur me qytetarët e Shqipërisë. Ne jemi të vendosur që bashkë me Aleancën e Teatrit për të rindërtuar Teatrin Kombëtar dhe për të dërguar në burg të gjithë ata që morën pjesë në këtë akt makabër. Sot nisi një ditë e re shprese.”