TEC-i Korçës/ Denoncimi, PD: Sotiraq Filo mashtroi, ai firmosi…
Duke shprehur mirënjohje për çdo qytetar, intelektual, ambientalist, përfaqësues të shoqërisë civile dhe çdo individ, që kundërshtuan ndërtimin e TEC-it, simbolit të korrupsionit të pamatur të qeverisjes qendrore dhe lokale, Partia Demokratike Dega Korçë reagon pas anulimit të këtij projekti ku regjimi i Edi Ramës bëri publike edhe letrën e kryetarit të Bashkisë Korçë, Sotiraq Filo, drejtuar Ministrit të Turizmit, Blendi Klosi, ku i bënte thirrje të mos aprovojë lejen pasi investitorët nuk kanë paraqitur asnjë garanci.
“Ideatorët, lobuesit, mbështetësit dhe përfituesit direkt të projektit, që do të shkatërronte çdo perspektivë zhvillimi të Korçës, nga ish-ministri i Bujqësisë NikoPeleshi, deri tek ekzekutori i verbër Sotiraq Filo, ditët e fundit, kanë bërë një hap pas, duke tentuar t’u mbushin mendjen korçarëve se ata, pikërisht ata, janë kundër ndërtimit të TEC-it,” thekson anëtarja e kryesisë së PD Korçë, Ledina Alolli duke shtuar se është pikërisht Sotiraq Filo ai i cili firmosi lejen për venddepozitimin e mbetjeve, që do të gjeneroheshin nga vënia në funksion e TEC-it:
“Partia Demokratike e Korçës ka siguruar dhe po bën publik dokumentin e datës 11 shtator 2018, ku thuhet qartë se, venddepozitimi i mbetjeve inerte është përcaktuar të jetë fusha e vjetër e mbetjeve ndërsa mbetjet e tjera do t’i dorëzohen kompanisë kontraktore të bashkisë. Ky dokument i sigluar me firmë abuzimi dhe vulosur me vulë turpi, është fytyra e vërtetë e Sotiraq Filos, i cili jo vetëm e ka mbështetur projektin “de facto”, por edhe “de jure” me vendimmarrjen e tij, duke i hapur rrugë ndërtimit të TEC-it, pa pyetur dhe dëgjuar askënd, veç urdhërdhënësve të tij.”
Çfarë do t’u thotë tani Sotiraq Filo qytetarëve të Korçës të cilët edhe një herë i tradhtoi dhe i goditi pas shpine? A do të ketë guxim ky kampion i korrupsionit të rilindjes të justifikojë firmën dhe vulën në një dokument që prodhon pasoja juridike me deklarata rrjetesh sociale dhe hartimesh të çartura? Dhe, si ka mundësi që edhe pse investitori ende nuk e kishte marrë lejen nga Ministria e Mjedisit dhe Energjitikës, Sotiraq Filo miraton lejen për caktimin e vendit ku do të grumbullonte TEC-i mbetjet? Janë disa nga pikëpyetjet që flasin për këtë projekt korruptim përveç se të dëmshëm për mjedisin ndërsa Ledina Alolli thekso se kryetari i Bashkisë Korçës me këtë rast u kishte rrëmbyer edhe tokën 50 familjeve të fshatit Barç.
Në fund, anëtarja e kryesisë së Partisë Demokratike Dega Korçë thekson se çfarëdo që të përpiqet të mohojë dhe fshehë Sotiraq Filo që firmos natën lejen për TEC-in dhe qan ditën para kamerave, që të zhbëjë atë për të cilën u investua, bashkë me Peleshin, anulimi i këtij projekti nuk është as merita jote, as e Peleshit, as e Klosit:
“Është fitore e një beteje të nisur dhe finalizuar nga mijëra qytetarë, edhe votues të tu, që i injorove dhe shpërfille, derisa karrigia ku je ulur t’u drodh dhe shkund nga zemërimi dhe revolta që mund të përmbysë edhe botën dhe, padiskutim, edhe ty. Kjo është e vetmja e vërtetë që qytetarët e Korçës ta përplasën në fytyrë, si një leksion të shkëlqyer të qëndresës dhe dashurisë për Korçën dhe për të cilën ti duhet të mbash përgjegjësi, edhe penale.” Ndryshe, djeMinistri i Turizmit dhe Mjedisit Blendi Klosi bëri të ditur se TEC-i nuk do të ndërtohet. Refuzimi i lejes mjedisore nga Agjensia Kombëtare e Mjedisit ka ardhur me argumentin se projekti nuk plotëson standardet e Bashkimit Europian.
