TEDA Koplik, Financat hapin garën për investitorët e interesuar

Zhvillimi i zonave teknologjike dhe ekonomike në vend ka qenë një proces që nuk ka rezultuar shumë i suksesshëm, pavarësisht procedurave konkurruese të hapura vit pas viti.

Së fundmi qeveria po tenton që të kalojë tek investitorët e interesuar zonën teknologjike dhe zhvillimit ekonomik të Koplikut në Malësinë e Madhe. Ministria e Financave njoftoi se ofertat nga investitorët e interesuar do të priten deri në 10 korrik.

Vlerësimi i kompanive do të bëhet përmes një sistemi pikëzimi ku pjesën më të madhe e merr kapaciteti financiar dhe mundësia e financimit të projektit me 40 pikë dhe më pas vjen propozimi teknik për ndërtimin e zonës.

“Kohëzgjatja e kontratës ose afati kohor për ekzekutimin: 99 (nëntëdhjetë e nëntë) vjet. Vendndodhja e objektit të kontratës: Zona e Teknologjisë dhe Zhvillimit Ekonomik  Koplik,  Malësi  e  Madhe,  ndodhet  në veri  të  qytetit  të  Koplikut.  Sipërfaqja  prej 61 (gjashtëdhjetë   e   një)   ha   i   përket   zonës kadastrale  nr.  2220  dhe  nr.  2221,  Koplik.  Kjo zonë  është  shpallur  me  VKM-në  nr.  463,  datë 22.6.2016,   “Për shpalljen e Zonës së Teknologjisë    dhe    Zhvillimit    Ekonomik    në Koplik, Malësi e Madhe”, të ndryshuar” përcaktohet në njoftimin e Financave.

Për herë të parë TEDA Koplik u shpall me një vendim të vitit 2016. Ky vendim përcaktonte se të paktën 15 njësi kadastrale ishin pjesë e zonës kryesisht toka arrë dhe kullota.

Veprimtaritë që do të zhvillohen në këtë zonë do të jenë kryesisht të llojit: prodhuese, industriale dhe agropërpunimi; tregtare dhe magazinimi mallrash dhe shërbime. Ndërsa periudha e funksionimit do të jetë 99 vjet dhe mund të jepet me qira me çmimin simbolik “1 euro”. Për zonën ekonomike të Koplikut më herët kanë shfaqur interes sipërmarrje nga Maqedonia e Veriut dhe Turqia.

Zona teknologjike dhe zhvillimore e Koplikut ka një pozicion strategjik pasi krijon ndërlidhje me Malin e Zi, Serbisë dhe Kosovës. Distanca e saj nga Porti i Shëngjinit është 45 km, nga Porti i Barit në Mal të Zi 34 km dhe 127 km nga Porti i Durrësit.

Në vend aktualisht ka zona të tjera teknologjike zhvillimore si ajo e Spitallës apo ajo e Tiranës në Kasharr që ka marrë edhe statusin e investimit strategjik./Monitor/