Telenovela PS vazhdon, të premten Asambleja…

Kryesia e Partisë Socialiste ka vendosur të thërrasë ditën e premte Asamblenë e Përgjithshme të PS-së, të shtunën përsëri Kryesia dhe më 30 Mars, Kongresi Zgjedhor.

Këto janë vendimet konkrete të kryesisë së Partisë Socialiste edhe pse nuk kanë lidhje me realitetin e rëndë shqiptarë që u krijua falë kësaj qeverisje, gjithçka tjetër është sikur Edi Rama po punon dhe kazanët e tij sikur po e pasqyrojnë.

Asgjë nga ndryshimet në qeveri, asgjë nga shkarkimet nga FRESSH por vetëm siç i ka hije PPSH-së, reflektim!

Ndonëse kryetari i PS kritikoi punën e të gjitha strukturave të PS, në veçanti si joefiçente gjatë zhvillimit të protestave të studentëve, e vetmja strukturë që ka funksionuar siç duhet, sipas Edi Ramës ka qenë Grupi Parlamentar kriminal i PS-së.

Pas mbledhjes së kryesisë, Edi Rama tha se Qeveria do të reflektoj nga gabimet e bëra në qeverisje dhe do të ketë përmirësime:

“Kemi diskutuar protestën, arsyet, faktorët, dobishmërinë e madhe të saj dhe domosdoshmërinë që ta mishërojmë si duhet atë që është shqetësimi real i asaj proteste dhe që është transmetuar në formën që ajo mori, nga shumë studentë që i thonë vetes apolitikë, por e kanë shkundur politikën në raport me të vërtetën, i kanë dhënë shuplakë qeverisë, po ashtu si kam thënë e po bëjmë, që protesta ka dinamikën e vet, kurse shqetësimi ynë i domosdoshëm pas asaj shuplake do vazhdojë në funksion jo vetëm të studentëve,” u shpreh Edi Rama pas takimit ndërkohë i pyetur për lëvizjet e mundshme në kabinetin e tij, duke mos shprehur ndonjë shqetësim shtoi:

“Çdo gjë hap pas hapi. Unë nuk e them asnjëherë fjalën fundit të parën. Gjithmonë mendohem gjatë para se të bëj lëvizjet. Di gjithmonë radhën e lëvizjeve. Ne do të bëjmë gjërat e duhura dhe do t’i përgjigjemi me dinjiteti shqetësimit të studentëve. Ka shumë për të bërë, njerëzit meritojnë më shumë akoma, në këtë aspekt kemi shumë për të korrigjuara. Të mësojmë prej gabimeve e të shkojmë përpara. E kemi lexuar me shumë vëmendje dhe me shumë respekt mesazhin e protestës.”

Kështu regjisori dhe producenti, Edi Rama pritet të vazhdojë të premten këtë telenovelë ndërsa qytetarët mbesin me shpresën se në Asamble do të merret ndonjë vendim në mënyrë që të realizoj ndonjërin prej premtimeve të vitit 2013. Dhe, vend për shpresë ka duke pasur parasysh vitin e ri zgjedhor në të cilin Shqipëria futet për pak ditë…