Tenderët, APP: Si do vlerësohen ofertat për marrëveshjet kuadër të institucioneve

Agjencia e Prokurimit Publik, APP, ka sjellë në vëmendje mënyrën sesi do të vlerësohen ofertat për marrëveshjet kuadër që zhvillohen për llogari të institucioneve nga Agjencia e Blerjeve të Përqendruara.

Në këtë kontekst APP ka theksuar se referuar udhëzimeve në fuqi duhet të mbahet parasysh rasti se kur mund të bëhet vlerësimi i ofertës me çmim për njësi dhe kur veprohet ndryshe.

Po kështu edhe ndarja në lote kur ka shpeshtësi të përdorimit të artikujve dhe që kanë një konsum të lartë. Marrëveshjet kuadër përdoren për një sërë blerjesh nga biletat e avionit tek karburanti.

“Agjencia e Prokurimit Publik (në vijim “APP”), në mbështetje të nenit 13, pika 2, germa “d” të Ligjit Nr. 9643, datë 20.11.2006 “Për prokurimin publik”, të ndryshuar (në vijim “LPP”), bën me dije se, ka bërë ndryshime në Udhëzimin Nr. 6, date 16.01.2018 “Për përdorimin e marrëveshjes kuadër dhe zhvillimin e saj me mjete elektronike”, të ndryshuar si dhe Udhëzimin Nr. 8, datë 20.02.2018. “Për Ngarkimin e Agjencisë së Blerjeve të përqendruara për kryerjen e procedurave të prokurimit publik, në emër dhe për llogari të Kryeministrit, Ministrave dhe institucioneve të varësisë, për disa mallra e shërbime”, të ndryshuar.

Me ndryshimet e bëra në këto dy udhëzime, autoritetet kontraktore duhet të mbajnë në konsideratë që të përdorin kriterin e vlerësimit të ofertës/ofertave fituese bazuar në çmimin për njësi, vetëm në ato raste kur autoriteti kontraktor e ka të pamundur objektivisht, të përcaktojë sasinë që do të prokurohet.

Gjithashtu, kur autoriteti kontraktor vlerëson të përdorë si kriter vlerësimi “çmimin më të ulët për njësi”, duhet të bëjë kujdes në organizimin e procedurës së prokurimit. Për këtë qëllim, po në këtë udhëzim është parashikuar që nëse, autoritetet kontraktore do të përdorin kriterin e vlerësimit të çmimit për njësi dhe në objektin e prokurimit ka artikuj që zenë një peshë specifike apo që përdoren më shpesh, atëherë autoritetet kontraktore duhet të aplikojnë ndarjen ne lote, duke përfshirë në një lot, zëra të artikujve sipas shpeshtësisë së përdorimit të tyre, p.sh artikuj qe kanë një konsum më të lartë të grupohen në një lot të veçantë.

Ndërkohë që, është ndryshuar edhe pika 5.1  e Udhëzimit nr. 8, date 20.02.2018, duke vendosur që, në rast se Agjencia e Blerjeve të Përqendruara e,ka objektivisht të pamundur, të përcaktojë sasinë që do të prokurojë, atëherë do të vlerësojë ofertën/ofertat fituese duke u bazuar në çmimin për njësi.

Gjithashtu, është parashikuar që, Agjencia e Blerjeve të Përqendruara nuk do të përdorë këtë metodë vlerësimi në rast se, prokuron për mallra dhe shërbime të vazhdueshme dhe kur sasitë janë të llogaritshme në bazë vjetore, sipas eksperiencës së mëparshme

Ne përfundim,  APP rekomandon  si vijon:

Në rast të përdorimit të metodës së vlerësimit bazuar në çmimin për njësi, operatoret ekonomike nuk duhet të tejkalojnë fondin e marrëveshjes kuadër të parashikuar nga autoriteti kontraktor referuar sasive të pritshme përkatëse,  kjo me qëllim shmangien e ofertave, të cilat referuar sasive të pritshme mund të tejkalojnë fondin limit të parashikuar të marrëveshjes.

Në rast të rihapjes së konkurrimit (marrëveshje  kuadër ku jo te gjitha kushtet janë të përcaktuara,  operatorët ekonomike nuk duhet të tejkalojnë çmimin për njësi të dhënë në ofertat e shpallura fituese” nënvizon APP./Monitor/