Tensione në veri, Chollet dhe Escobar të hënën në Kosovë
Këshilltari i Departamentit amerikan të Shtetit, Derek Chollet, të hënën do të nisë një vizitë dyditore në Kosovë.
Ai pritet të jetë i shoqëruar nga i dërguari i Shteteve të Bashkuara për Ballkanin Perëndimor, Gabriel Escobar.
Në një përgjigje për RFE, një zëdhënës i Departamentit amerikan të Shtetit, tha se Escobar udhëton shpesh në rajon dhe do të jetë aty për konsultime të rregullta.
Përmes një njoftimi për media, DASH bëri të ditur se Chollet, përveç në Kosovë, do që qëndrojë edhe në Serbi, Bosnje Hercegovinë, Maqedoni të Veriut, Mal të Zi, Kroaci dhe Belgjikë nga 11 deri më 17 dhjetor.
“Më 12 dhe 13 dhjetor, Chollet do të qëndrojë në Prishtinë, ku do të takohet me zyrtarët qeveritarë dhe liderë të tjerë politikë, me të cilët do të bisedojë për vazhdimin e bashkëpunimit në një sërë fushash, përshirë përpjekjet e SHBA-së për të avancuar integrimin e Kosovës në strukturat evropiane dhe euro-atlantike, edhe përmes dialogut të lehtësuar nga BE-ja për të arritur një marrëveshje gjithëpërfshirëse për normalizimin e raporteve midis Kosovës dhe Serbisë, të përqendruar në njohje reciproke”, thuhet në njoftim.
Ndërkaq, më 13 dhjetor, Chollet do të vizitojë Serbinë.
Vizita e tyre pritet të ndodhë në kohën e rritjes së tensioneve në veri të Kosovës.
Më 6 dhjetor, disa grupe të qytetarëve serbë kanë penguar hyrjen e zyrtarëve të Komisionit Qendror Zgjedhor në zyrat e këtij institucioni në veri, me qëllim të përgatitjes për zgjedhje, dhe kështu kanë shkaktuar incidente me armë zjarri.
Për incidente të tilla është raportuar në Zubin Potok dhe Mitrovicë të Veriut, komuna me shumicë serbe në veri të Kosovës.
Një ditë më vonë, në Mitrovicë të Veriut është raportuar për dy shpërthime me shok bomba.
Mbrëmë Policia e Kosovës njoftoi se një pjesëtar i saj është lënduar lehtë gjatë një sulmi të armatosur në veriun e Kosovës. Në një njoftim të policisë thuhet se sulmi ka ndodhur reth orës 23:00 në fshatin Serbovc të komunës së Zveçanit.
Sipas policisë, njësitë që ishin në detyrë “janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM. Si pasojë e incidentit, një pjesëtar i Policisë së Kosovës është lënduar lehtë dhe janë shkaktuar dëme të konsiderueshme materiale në veturën e policisë”.
Zgjedhjet për komunat veriore – Mitrovicë e Veriut, Zubin Potok, Leposaviç e Zveçan – janë caktuar për 18 dhjetor, pasi kryetarët e tyre kanë dhënë dorëheqje si shenjë pakënaqësie ndaj vendimit të Qeverisë së Kosovës për riregjistrim të targave serbe në RKS – Republika e Kosovës.
Ndërkohë palët kanë arritur marrëveshje.
Kosova është pajtuar që të pezullojë planin e saj për riregjistrim të makinave me targa serbe në RKS, derisa Serbia është zotuar se nuk do të lëshojë më targa të reja për serbët në veri.
Vetë Chollet ka biseduar me Kurtin lidhur me çështjen e targave dhe ka bërë thirrje “për të punuar urgjentisht për normalizimin e marrëdhënieve ndërmjet Kosovës dhe Serbisë në dialogun e lehtësuar nga BE-ja, të cilin SHBA-ja e mbështet fuqishëm”.
Vizita e tyre vjen po ashtu disa ditë pas njoftimit të kryediplomatit evropian, Josep Borell, se Prishtinës dhe Beogradit u është dorëzuar teksti i përditësuar i të ashtuquajturit plan franko-gjerman për normalizimin e marrëdhënieve.
Ky plan, i mbështetur nga Shtetet e Bashkuara, synon për zgjidhjen e mosmarrëveshjeve mes dy vendeve.
Më herët gjatë javës, i dërguari i BE-së për dialogun, Mirosllav Lajçak, ka vizituar Kosovën dhe Serbinë.
Kosova dhe Serbia, raporton RFE, kanë nisur negociatat për normalizimin e marrëdhënieve më 2011, me ndërmjetësimin e Bashkimit Evropian. Procesi i negociatave pritet të përfundojë me marrëveshje ligjërisht të detyrueshme. Ndonëse Kosova deklaron se kjo marrëveshje duhet të përfshijë njohjen e ndërsjellë, Serbia nuk pranon, duke insistuar në “zgjidhje kompromisi”.
