Tensione në veri, Kurti: Policia e Kosovës nuk ndjekë e përndjekë në baza etnike!
Duke folur për situatën në veri dhe tensionet e krijuara, kryeministri i Kosovës, Albin Kurti, tha para deputetëve se vazhdimisht është në konsulta e në bashkërendim me faktorin ndërkombëtar, ndërsa shtoi se ata janë ambasadorë të Quintit por ata nuk bëhen dot ministra.
“Ministra janë qytetarët e këtij vendi, aktualisht në qeverinë tonë. E qeveritë e vijnë shkojnë, por shteti mbetet. Ai është caku ynë, ai është kuptimi ynë. Andaj bashkërendimi me faktorët ndërkombëtar nuk mund të bëhet në mënyrën në të cilën ne i trajtojmë ata si ministra e vetë bëhemi zëvendës të tyre, sepse as ata nuk e duan këtë gjë,” tha Kryeministri nga foltorja e parlamentit duke falënderuar të gjithë për mbështetjen që po u bëjnë organeve të shtetit të Kosovës, të cilët, siç tha Kurti, po zbatojnë dhe respektojnë dhe me shembullin e tyre po nxisin edhe të tjerët të kenë vlerësimet më të larta dhe respektin e vazhdueshëm për kushtetutshmërinë në Republikën e Kosovës.
“Policia e Republikë së Kosovës, organet e tjera të sigurisë asnjëherë nuk ndjekin, nuk përndjekin, nuk vëzhgojnë ndokënd në baza etnike, fetare apo të tjera, por vetëm sipas sjelljeve dhe veprimeve të tyre individuale dhe grupore.
Policia e Kosovës kurrë nuk është e drejtuar, e nxitur e orientuar kundër serbëve, përkundrazi ajo ka një konsideratë shtesë për serbët në Kosovë pikërisht për shkak të keqinterpretimeve të ndryshme që mund të bëhen nga fqinji ynë verior. Por, në të njëjtën kohë ne kemi obligime dhe përgjegjësi që dalin nga kushtetuta e ligji.”
Albin Kurti tha se kur japin dorëheqje kryetarët e 4 komunave në veri, më pas ka obligime kushtetuese e ligjore dhe gjithashtu edhe detyra për zyrtarët e shtetit
“Presidentja duhet të konsultojë krerët e partive politike, duhet të caktohet një datë. Duhet të ndiqen procedurat lidhur me zyrtarët e KQZ-së të cilët i kanë zyrat e objektet e tyre edhe në veri të Ibrit. Nuk janë vendime dhe veprime politike, por veprime dhe vendime shtetërore që i parasheh kushtetuta dhe ligji.
Andaj natyrisht që unë plotësisht e njoh, e respektoj të drejtën për kritikë ndaj qeverisë e kryeministrit, por duhet ta kuptoni që shumëçka, për të mos thënë gjithçka që po ndodhë është çështje e shtetit të Kosovës e ne përpiqemi me atë çka mundemi e dimë të jemi më së shumti në shërbim të saj,” tha Kurit duke kërkuar mbështetjen publike dhe ide konkrete nga deputetët sepse, siç tha, qëllimi është i përbashkët.
“Sepse logjika e tyre është territoriale e qëllimi i tyre është hegjemonia, por as kjo nuk është e mundur sepse serbët në veri nuk po iu bashkëngjiten bandave atje. Një serb në Graçanicë e një në Zveçan nuk kanë dallime. Dallim kanë që të dy këta me bandat kriminale, prandaj është shumë e rëndësishme që e vërteta të jetë publike dhe ne të konfrontohemi me të gjithë ata që dëshirojnë ta shtrembërojnë e deformojnë atë,” tha Kryeministri i Kosovës duke akuzuar Beogradin se dëshiron që serbët në jug si puna e ministrit Nenad Rashiq t’i shpallin tradhtar.
“Ky është plani B i tyre, por qysh ka dështuar plani A do të dështojë edhe plani B. Unë besoj që beteja kryesore sot është beteja për mbështetjen e mekanizmave tonë shtetëror dhe për fuqizimin e shpjegimit të vërtetë për situatën në terren.”
