Tensione në Veri, Rama në “Globsec”: Ushtria serbe në kufi me Kosovën, çfarë mund të bëjë, asgjë!
Kryeministri Edi Rama në Konferencën për Siguri Globale në Bratislavë, “Globsec” e vlerësoi sot mobilizimin e ushtrisë serbe në kufi me Kosovën si një shfaqje të pabesueshme e zhvleërsoi veprimin e kësaj ushtri duke konstatuar se nuk mund të bëjë asgjë.
“Për fat të keq gjithmonë përpara se të vijë vera kemi probleme në pjesën veriore të Kosovës. Atje nuk ka det dhe kokat nxehen. Ku ishin 20 vjet më parë, apo 10 vjet më parë? Ishim në një gjendje shumë më të vështirë. Sot Ballkani Perëndimor është në situatën më të mirë. Gjërat mes Kosovës dhe Serbisë janë vetëm një hap larg një marrëveshje, tani të dyja palët janë në një moment hezitimi. Kjo është perspektiva. Është më mirë se në çdo kohë.
Ky konflikt aty ka një arsye që në këndvështrimin tim mund të ishte shmangur tërësisht. Por nuk është tregues i problemeve konkrete. Ka kryetarë komunash të zgjedhur me 1% të votave dhe 99% nuk ndihen të përfaqësuar. Ka një hezitim për të arritur marrëveshjen,” tha Edi Rama ndërsa për urdhërin e Presidentit të Serbisë, Aleksandar Vuçiç për mobilizimin e ushtrisë në kufi me Kosovën pas rritjes së tensioneve shtoi.
“Kjo është shfaqja më e pabesueshme e politikës së brendshme. Se ushtria serbe në kufi të Kosovës ka fuqi 0. Çfarë mund të bëjë, asgjë? Ka të bëjë vetëm me politikën e brendshme!”
Në panelin e diskutimit mbi Ballkanin, “Open Roads: Balkans Back in Business”, Kryeministri Edi Rama tha se ishte dakord me Presidenten e KE, Ursula Von der Leyen, se vendet e Ballkanit Perëndimor duhet të kenë disa përfitime përpara zgjerimit por kishte vërejtje për shpërndarjen e fondeve nga BE
“Ndihemi të privilegjuar që të kemi hapësirën tonë në këtë konferencë të sigurisë globale. Më lini t’ju përmend disa të dhëna për të ndihmuar diskutimin dhe për të dhënë një përgjigje siç duhet. Më lini ta nis me atë çfarë ndodhi në Europë dhe brenda shteteve të BE-së në përgjigje të krizës së madhe që goditi Europën, por që na goditi edhe ne.
Kjo shpjegon atë hendek të jashtëzakonshëm midis shteteve anëtare të BE-së dhe midis nesh, shteteve të Ballkanit Perëndimor. Midis 2020-2021 përmes dy paketave shumë të mëdha që ishte instrumenti për rimëkëmbjen dhe rezistencën e BE-së, BE dha 47.5 mld plus 672 mld për shtetet anëtare. Ndërkohë që për ne u dha 1 mld për të gjashtë ne, mes të cilave 500 mln në grante dhe 500 mln në hua. 500 mln që ishin në grant, mbështetja e drejtpërdrejt për problemin tonë të përbashkët të energjisë, nga të cilat Shqipëria mori 85 mln euro ishin rishpërndarje e fondeve të IPA-s, praktikisht ajo çfarë duhet të merrnim nga fondet IPA për projekte të caktuara, u riorientuam në këtë kontribut të drejtpërdrejt në buxhetin tonë prej 85 mln. Nuk po them që nuk ishte diçka e mirë, por ishte një rishpërndarje.
Pika e dytë që dua të them është se dhënia e granteve nga BE për shtetet anëtare në Evropën Juglindore do të jetë 11 fish më e madhe krahasuar me BP.
Pika e tretë që dua të përmend është se fondet e IPA-s ajo çfarë marrim janë 90% ndihmë teknike dhe 10% investime. Fondet e synuara të kohezionit janë 92% dhe 0.3 % ndihmë teknike.
Pika e fundit që dua të përmend në shifra është se fondet e dhëna nga buxheti i BE-së midis 6 vendeve të Ballkanit Perëndimor krahasuar me shtetet anëtare e BE-së, janë 138 euro për qytetar në Ballkanin Perëndimor dhe 4570 euro për qytetarët e BE,” tha Edi Rama në “Globsec” duke shtuar se kjo është arsyeja përse mendon që ky është një problem jetë a vdekje dhe pse bie dakord me atë çfarë tha Ursula ndërsa përfundoi:
“Natyrisht që procesi i negociatave të anëtarësimit do të kërkojë kohë dhe nuk duhet nxituar, duhet të jetë një proces sistematik dhe i konsoliduar, por na duhet të marrim diçka më shumë dhe diçka duhet të ndryshojë në mënyrë thelbësore në marrëdhënien mes BE-së dhe Ballkanit Perëndimor në qoftë se nuk duam të shohin Ballkanin Perëndimor të kthehet pas sërish.”
