Tërmet i fuqishëm godet Italinë

Një tërmet i fuqishëm ka goditur bregun verilindor të Italisë mëngjesin e sotëm, duke shkaktuar dëmtime në disa ndërtesa. Si pasojë e tërmetit, personeli dhe pacientët e një klinike shëndetësore janë evakuuar.

Ende nuk ka raportime për dëme në njerëzve, raporton RFE, ndërkohë Kryeministrja italiane, Giorgia Meloni, tha se është në kontakt me agjencinë e mbrojtjes civile të shtetit, që monitoron situatën.

Instituti i vullkanologjisë i Italisë tha se tërmeti prej 5.7 të shkallës Rihter goditi Italinë në orën 07:07 të mëngjesit të 9 nëntorit. Epiqendra e tërmetit ishte në Ankona, në Detin Adriatik, që gjendet në rajonin Le Marçe.

Ndërsa Qendra Sizmologjike Mesdhetare, EMSC, raporton për një tërmeti i cili ra në orën 07:07 me magnitudë 5.6 të shkallës Rihter, thellësi 10 km dhe epiqendër 27 kilometra nga Fano dhe 63 kilometra nga Rimini. 

Sipas mediave italiane, klinika private Villa Igea në Ankona, evakuoi pacientët si masë parandaluese.

Autoritetet kanë ndërprerë operimin e trenave në rajonin e goditur nga tërmeti, ndërkaq ende nuk dihet nëse nxënësit do t’i ndjekin mësimet në shkolla.

Një tërmet vdekjeprurës më 2016 kishte goditur rajonet Marçe, Umbria dhe Lazio, duke vrarë 297 persona dhe plagosur qindra të tjerë.