Tërmet politik në lindje: AfD fiton në Thuringi

Partia e kategorizuar si ekstremiste e djathtë, AfD fitoi në landin Thuringi, kurse në Saxony u rendit e dyta. Partitë populiste dalin të forcuara nga zgjedhjet në dy landet gjermane Saxony dhe Thuringi.

Partia e djathtë ekstreme gjermane, Alternativa për Gjermaninë, AfD sipas rezultateve paraprake ka dalë fituese në zgjedhjet për parlamentin e landit në Thuringi me 32.8 për qind të votave pasuar nga CDU me 23.6 për qind të votave. Në Saxony CDU me kryeministrin Michael Kretschmer arrin të fitojë zgjedhjet e landit me 31.9 për qind të votave, sipas rezultateve paraprake.

Kancelari Scholz i cilësoi “të hidhura” rezultatet e zgjedhjeve në lande. Partitë demokratike duhet të formojnë koalicione pa ekstremistët e djathtë, tha Scholz. “Vendi ynë nuk mund dhe nuk duhet të mësohet me këtë. AFD e dëmton Gjermaninë. Ajo dobëson ekonominë, përçan shoqërinë dhe shkatërron emrin e vendit tonë.”

AfD dëshiron të formojë qeverinë në Thuringi. Kështu u shprehBashkë-kryetari i partisë, AfD, Tino Chrupalla, tha në kanalin televiziv gjerman ZDF, se fitorja e AfD-së është një “mandat i qartë” për të formuar qeverinë. “Kjo është ajo çka e bën demokracinë,” shtoi ai.

Chrupalla gjithashtu deklaroi se partia e tij është e gatshme të bisedojë me të gjitha partitë e tjera. “Për ata që duan të jenë të besueshëm në politikë… dhe duan të marrin në konsideratë zërin e votuesve, nuk do të ketë më politikë pa AfD-në,” tha ai.

Formimi i një qeverie si në Thuringi, ashtu edhe në Saksoni, pritet të jetë i vështirë. Deri tani të gjitha partitë e tjera kanë thënë se nuk duan të bashkëpunojnë me AfD. Një parti që ndoshta mund të ketë shans të hyjë në qeverisje është Aleanca Sahra Wagenknecht, BSW, e cila në të dy landet ka dalë e treta dhe me një rezultat dyshifror. 

Test për zgjedhjet federale në vitin 2025

Partitë e koalicionit të qendrës së majtë të kancelarit socialdemokrat Olaf Scholz në zgjedhjet në Saxony dhe Thuringi dolën të dobësuara. Socialdemokratët mbetën në nivel njëshifror në të dy landet. Të Gjelbrit dhe liberalët, FDP, kanë pësuar humbje drastike në të dy landet, megjithëse në Saksoni ata mbeten ende në parlament, kurse në Thuringi nuk e kanë kapur dot pragun e nevojshëm prej pesë për qind. 

Zgjedhjet parlamentare në Saxony dhe Thuringi, si edhe në landin tjetër gjermnolindor, Brandenburg më 22 shtator, konsideroheshin si test për zgjedhjet e ardhshme për parlamentin federal, në vitin 2025./DW/