LIVE/ Tërmet shkatërrimtar në Turqi, qindra të vdekur dhe mijëra të plagosur

Një tërmet me magnitudë 7.8 të shkallës Rihter ka goditur mëngjesin e sotëm jugun e Turqisë duke përfshirë dhe Sirinë fqinje. Aktualisht, numri i të vdekurëve nga tërmeti shkatërrimtar ka shkuar mbi 520 persona ndërsa janë mbi 2300 të plagosur ku aksioni i kërkim shpëtimit vazhdon mbi rrënojat apokaliptike që la tërmeti.

Sipas institutit sizmik amerikan USGS, tërmeti shkatërrimtar me magnitudë 7.8 ka goditur Turqinë në orën 04:17 me thellësi 17.9 kilometra. Mendohet se numri i viktimave është shumë më i madh sepse tërmeti ra kur shumicë e njerëzve ishin në gjumë.

Epiqendra e tërmetit ishte në Qarkun Pazarcik, në Krahinën Kahramanmaras në juglindje të Turqisë, rreth 60 kilometra larg kufirit me Sirinë.

Pas tërmetit shkatërrimtar ka reaguar dhe Presidenti Reccep Tayyip Erdogan përmes rrjetit social Twitter duke theksuar se ekipet e kërkim shpëtimit nga i gjithë vendi janë nisur drejt vendngjarjes.

“Shpresojmë se së bashku do të arrijmë ta përballojmë këtë katastrofë me dëme sa më të vogëla.”

Ministri turk i Punëve të Brendshme, Süleyman Soylu, tha se disa krahina janë goditur, se pallatet janë rrënuar dhe është kërkuar ndihmë ndërkombëtare.

Tërmeti më i fuqishëm në historinë e Turqisë dhe Sirisë

Drejtuesi i Qendrës Kombëtare të Tërmeteve në Siri, Raed Ahmed, tha për radion shtetëtrore siriane se ky është tërmeti më i madh i shënuar ndonjëherë në historinë e kësaj qendre. Qendra është formuar në vitin 1995.

Oh my word, a prelim. magnitude 7.8 earthquake in southeastern Turkey just now. The epicentre is near to the Syrian border where there is quite a high population density. Even before we get more info, you know this isn’t going to be good. My thoughts are with everyone caught up pic.twitter.com/Q27vDgpQ1A

— Stephen Hicks ?? (@seismo_steve) February 6, 2023

Ndërkohë moti i keq po vështirëson dhe operacionet e kërkim shpëtimit në qytetet e shumëta të rrafshuara me tokë.

“Fluturimet nga Stambolli dhe nga Ankaraja drejt Turqisë lindore janë anuluarpër shkak të erës, shiut dhe borës në Stamboll si dhe stuhisë së fuqishme në Ankara. Në Gaziantep është gjithashtu stuhi me borë, në Karamanmaras shi, dhe njerëzit vazhdojnë të qëndrojnë jashtë nga frika e tërmeteve të radhës,” raportojnë mediat turke duke folur për dhjetëra pasgoditje.

Ndryshe, pas tërmetit të fuqishëm, janë shënuar 18 pasgoditje me magnitudë më të fuqishme se 4, raporton Instituti Gjeologjik i Shteteve të Bashkuara, USGS.

Sipas USGS, janë shënuar shtatë tërmete me magnitudë më të fuqishme se 5 të shkallës Rihter.

Pasgoditja më e madhe ndodhi vetëm 11 minuta pas tërmetit më të fuqishëm dhe ishte me magnitudë 6.7 të shkallës Rihetr, raporton USGS. Ekspertët parashikojnë se pasgoditje tjera të fuqishme do të vazhdojnë në orët në vijim, madje edhe me ditë tëra.