Tërmeti i fuqishëm tronditë Kroacinë, shtohen 29 raste me koronavirus
Situata e vështirë nëpër të cilën po kalon Kroacia me koronavirus tashmë me 235 të prekur, mëngjesin e sotëm u përkeqësua me një tërmet të fuqishëm me magnitudë 5.3 të shkallës Rihter.
Qendra Sizmologjike Mesdhetare, EMSC, ka raportuar për një tërmet të fuqishëm në orën 6:24 me magnitudë 5.3 të shkallës Rihter dhe thellësi 10 km, me epiqdendër vetëm 7 km nga Zagrebi. Të gjithë qytetarët në panik kanë braktisur shtëpitë e tyre përkundër ndalimit nga Shtabi Kombëtar i Mbrojtjes Civile për shkak të koronavirusit, dhe vetëm pas 37 minutave ka pasuar edhe një tërmet me fuqi 5.0 të shkallës Rihter, 6 km nga Zagrebi pas të cilit qytetarët kanë filluar ta braktisin kryeqytetin kroat ndërsa ushtria ishte në rrugë në ndihmë kryesisht të sëmurve nëpër spitale që janë dëmtuar.
Kryeministri Andrej Plenkoviç tha se tërmeti i cili goditi sot Zagrebin është më i fuqishmi në 140 vitet e fundit ndërsa u bëri thirrje qytetarëve që po qëndrojnë para pallateve që të mbajnë distancë nga njëri tjetri dhe të jenë të qetë.
“Në këtë moment është e qartë se ka dëmtime të shumta nëpër pallate. I bëjmë thirrje qytetarëve për kujdes. Ju rekomandojmë që pavarësisht se është ftohtë, të qëndrojnë para pallateve të tyre dhe nuk ka nevojë për panik. Nuk ka nevojë të shkoni pranë karburanteve të mëdha por vetëm mbani distancë ashtu siç ka rekomanduar Shtabi Kombëtar i Mbrojtjes Civile,” tha Plenkoviç duke e pranuar se janë pranë dy krizave kontradiktore.
Pas tërmetit të fuqishëm kanë dalë edhe pamjet nga kamerat e sigurisë që tregojnë dhe situatën e frikshme nëpër të cilën po kalon Kroaci:
Apo ato vendosura në shtëpi:
Ndërkohë nga Shtabi Kombëtar i Mbrojtjes Civile, Ministri i Shëndetësisë, Vili Berosh, duke konfirmuar se 15 vjeçarja e lënduar në Zagreb është në gjendje të rëndë tha se tërmeti nuk shkaktoi dëme të mëdha materiale në institucionet shëndetësore dhe paralajmëroi se pacientët se do të kthehen në spitale sapo ekspertët e ndërtimtarisë të japin dritën jeshile. Jashtë përdorimit është vetëm salla e ndërhyrjeve në Qendrën Klinike “Motrat e mëshirshme”,” tha Berosh ndërsa dëmtimet në Klinikën Infektive “Dr.Fran Mihaljeviç” nuk janë vlerësuar të mëdha.
“Ruani veten dhe të tjerët. Rrini jashtë shtëpive, por veshuni mirë. Vëni kapelat, dorezat, xhupat e trashë, shallet në gojë. Dhe, mbani distancë. Mos bëni panik. Do të ftoheni dhe pastaj do të mendoni në koronën,” tha Drejtorja e Institutit kroat për Mjekësi urgjente, Maja Grba Bujeviç.
Në ndihmë të nënave në maternitetin e dëmtuar dhe sapolindurve në Zagreb kanë dalë edhe tifozët e KF Dinamo, “Bad Blue”:
Ndryshe, nga raportimi i fundit në Kroaci janë shënuar edhe 29 raste të reja, ka bërë të ditur sot Shtabi Kombëtar i Mbrojtjes Civile duke e çuar kështu në 235 numrin e të prekurve.
Ndërkohë nga tërmeti i orës 7:01 me magnitudë 5.0 të shkallës Rihter, EMSC ka raportuar edhe për 3 tërmete me magnitudë nga 3.7 – 3.0 të shkallës Rihter.
