Tërmeti i gjunjëzoi/ Qeverisë, Basha: Pesë masa për ringritjen e biznesit!

Pas takimit me pronarët dhe punonjësit e fasonerive dhe një punishte përpunimi qumështi zonën e Durrësit të prekur nga tërmeti, Kryetari i Partisë Demokratike, Lulzim Basha, i kërkon qeverisë të marrë menjëherë 5 masa për ringritjen e biznesit në këto zona.

“Kriza ekonomike që ka përfshirë vendin dhe pasojat e tërmetit, kanë gjunjëzuar biznesin e Durrësit, një prej ekonomive më të rëndësishme të vendit. Shteti deri tani ka qene inegzistent për të ndihmuar në ringritjen e biznesit, ” tha Lulzim Basha pas takimit me pronarët dhe punonjësit të cilët i shprehën shqetësimin e tyre se situata po i çon drejt falimentimit.

“Shumë punonjës ende nuk janë rikthyer në punë pasi janë detyruar të strehohen larg vendbanimit të tyre në pamundësi të përballimit të kostove të një shtëpie me qera apo të jetojne në çadra.”

Deri tani, konstaton Kryetari i Partisë Demokratike, nuk kanë marrë asnjë bonus qeraje, ndërsa i sorollasin nga njëra zyrë në tjetrën.

“Bizneset nuk kanë patur asnjë mbështetje nga shteti për dëmet e shkaktuara ndërkohe që duhet të paguajnë taksat e rritura dhe fuqia blerëse është në nivelet minimale,” thekson Kryetari i Partisë Demokratike, Lulzim Basha, duke vlerësuar se mosmarrja e masave të menjëherëshme, do të sjellë pasoja të rënda për ekonominë dhe punësimin në Durrës dhe gjithë Shqipërinë ndërsa i kërkon edhe njëherë qeverisë të marrë 5 masa të menjëhershme për ringritjen e biznesit në zonat e prekura nga tërmeti:

1.Përjashtim nga taksa e pronës dhe nga të gjitha taksat dhe tarifat vendore gjatë periudhës së rindërtimit për të gjithë operatorët ekonomikë me aktivitet në zonat e prekura.

2. Përjashtimin nga tatim fitimi për të gjitha subjektet që e ri-investojnë fitimin për të rikuperuar dëmet e tërmetit.

3. Pezullimin e kontributeve të sigurimeve shoqërore dhe shëndetësore për periudhën deri në rikuperimin e dëmeve dhe pagesat e shtyra të kryhen me këste pas periudhës së rikuperimit.

4. Përjashtimin nga tvsh për të gjitha materialet, lëndët e para, mjetet kapitale që përdoren për rikuperimin e dëmeve.

5. Pezullimin dhe fshirjen e pagesave të faturave të energjisë dhe të ujit gjatë kohës së gjendjes së fatkeqësisë natyrore.