Tërmeti, KE: 15 mln euro ndihmë financiare për Shqipërinë

Komisioni Evropian, KE, i ndau 15 milionë euro ndihmë humanitare Shqipërisë, pas tërmetit që e goditi më 26 nëntor. Lajmi u bë i ditur nga Komisioneri evropian për Zgjerimin, Oliver Varhelyi, në Komitetin për Politikë të Jashtme pranë Parlamentit Evropian.

Varhelyi po ashtu tha se Bashkimi Evropian do të organizojë një Konferencë Donatorësh për t’i ndihmuar Shqipërisë të rindërtojë vendbanimet e shkatërruara nga tërmeti, raporton RFE.

Tërmeti prej 6.4 shkallësh të Richterit la mbi 50 persona të vdekur dhe qindra të plagosur.

Ndryshe, nesër Shqipërinë do ta vizitojë Komisioneri evropian për Menaxhimin e Krizave, Janez Lenarçiç. Komisioneri Lenarçiç pritet të takohet me ekspertë nga Ekipi Evropian i Mbrojtjes Civile, si dhe inxhinierë italianë dhe grekë.