Tërmeti shkatërrimtar, mbi 1000 të vdekur në Mianmar
Tërmeti i fuqishëm u ndje në disa vende të Azisë Juglindore. Më së shumti u godit Mianmari. Humbje jete u raportuan edhe në Tailandë.
Numri i të vdekurve pas tërmetit të fuqishëm në Mianmar është rritur në më shumë se 1000, sipas shifrave zyrtare. Qeveria ushtarake e Mianmarit deklaroi sot se nga tërmeti kanë humbur jetën 1002 të vdekur dhe 2376 të plagosur. Kreu i juntës ushtarake, Min Aung Hlaing, urdhëroi një operacion të menjëhershëm shpëtimi në rajonet e prekura.
Gjendje e jashtëzakonshme në Mianmar
Dje junta ushtarake e Mianmarit raportoi fillimisht numër të vogël vdekjesh, 144 vetë. Qeveria ushtarake i kërkoi ndihmë komunitetit ndërkombëtar dhe shpalli gjendjen e jashtëzakonshme në mjaft pjesë të vendit. Masat vlejnë si për kryeqytetin Naypyidav, Mandalay dhe gjashtë rajone dhe shtete të vendit, njoftoi televizoni shtetëror, MRTV.
Që nga grushti ushtarak në vitin 2021, në Mianmar mbretërojnë dhuna dhe kaosi. Grupe të ndryshme rebele luftojnë mes tyre, disa me sukses kundër ushtrisë. Si rrjedhojë, nga shumë rajone të vendit vijnë vetëm informacione të pakta ose aspak për shkallën e dëmeve dhe numrin e mundshëm të viktimave.
Sipas Qendrës Gjeokërkimore Gjermane Helmholtz dhe Observatorit Amerikan të Tërmeteve, USGS, dje tërmeti ka qenë me magnitudë 7.7 ballë. Një tërmet i dytë dymbëdhjetë minuta më vonë u tha se kishte një magnitudë 6.4. Burimi i tërmetit ishte rreth dhjetë kilometra në thellësi. Lëkundjet u ndjenë edhe në pjesë të Kinës, Indisë dhe Bangladeshit. Në Kinë, provinca Yunnan, e cila kufizohet me Mianmarin, u prek veçanërisht, siç raportoi televizioni shtetëror kinez.
Vdekje u raportuan edhe në Tailandë
Nga tërmeti u trondit edhe Tailanda fqinje. Në kryeqytetin Bangkok u shemb një godinë 30-katëshe e papërfunduar. Punonjësit e shpëtimit janë ende në kërkim të të mbijetuarve. Sipas Ministrisë së Mbrojtjes së Tailandës, më shumë se 100 persona janë ende në rrënoja. Ka raportime të ndryshme për numrin e të vdekurve dhe të zhdukurve. Mediat raportojnë se dhjetë viktima janë gjetur deri më tani në Bangkok. Tre vdekje janë konfirmuar zyrtarisht./DW/
