Tërmeti shkatërrimtar në Haiti, mbi 700 të vdekur

Agjencia për Mbrojtje Civile në Haiti tha se numri i viktimave nga tërmeti i fuqishëm që goditi dje vendin, ka arritur në 724 dhe të paktën 2.800 persona kanë mbetur të lënduar.

Agjencia tha se shumica e viktimave ishin nga pjesa jugore e vendit, raporton RFE, dhe se ekipet e shpëtimit kanë arritur që të nxjerrin shumë njerëz të gjallë nga rrënojat e shtëpive, hoteleve, kishave, që u dëmtuan nga tërmeti i fuqishëm.

Dëme të mëdha janë raportuar në qytetin Jeremie, shtëpi e 200.000 banorëve. Dëme po ashtu ka edhe në qytetin Les Cayes ku janë shembur shumë ndërtesa përfshirë edhe një hotel shumëkatësh.

Kryqi i Kuq Ndërkombëtar dhe spitalet në zonat e paprekura nga tërmeti po ndihmojnë të plagosurit, tha kryeministri Henry.

Ndryshe, dje në orën 8:30 Haiti u godit nga një tërmet me magnitudë 7.2 të shkallës Richter. Epiqendra e tërmetit ishte rreth 150 kilometra në perëndim të kryeqytetit, Port au Prince.

Para 11 vitesh, Haiti u godit nga një tërmet me magnitudë 7.0 të shkallës Richter, ku mbetën të vdekur mbi 200.000 persona.