Tërmeti shkatërrimtar në Turqi, sot fillon rindërtimi

Tashmë kur Autoriteti i Menaxhimit të Fatkeqësive dhe Emergjencave i Turqisë, AFAD, raporton se numri i të vdekurve nga dy tërmetet e fuqishme të 6 shkurtit është rritur në 42.310 ndërsa mbi 100 mijë janë të lënduar, sot në disa provinca jugore, siç janë Nurdagi, Islahiya, Kilis dhe Adiyaman Kahta pritet të fillojnë punimet për ndërtimin e ndërtesave të reja të banimit.

“Janë nënshkruar kontratat e para për ndërtimin e ndërtesave në vendet ku janë kryer kërkimet e nevojshme dhe në lidhje me ndërtimin e paralajmëruar të ndërtohen 200 mijë apartamenteve të reja në qytetet jugore të Turqisë që u prekën nga tërmetet shkatërruese të 6 shkurtit,” njoftoi presidenti i Turqisë, Recep Tayyip Erdoğan, raporton TRT Balkan.

Ndërkohë AFAD njoftoi se dy tërmetet me qendër në Kahramanmaraş u pasuan nga 7.184 pasgoditje, raporton Anadolu.

Tërmetet me magnitudë 7.7 dhe 7.6 ballë goditën edhe dhjetë provinca të tjera, respektivisht provincat Adana, Adimay, Diyarbakır, Hatay, Gaziantep, Malatya, Kilis, Osmaniye, Elaziğ dhe Şanliurfa, ndërsa u prekën mbi 13 milionë njerëz.

Disa vende në rajon, përfshirë Sirinë dhe Libanin, po ashtu ndjenë lëkundjet e forta që goditën Turqinë brenda më pak se dhjetë orë.

AFAD njoftoi se në zonën e tërmetit ekipet ngritën gjithsej 301.289 tenda dhe 6.375 kontejnerë që u dërguan nga ministritë dhe institucionet përkatëse, si dhe nga vende të tjera dhe organizata ndërkombëtare.

Aktualisht janë 14.740 persona vendor dhe ndërkombëtar të angazhuar në ekipet e kërkim-shpëtimit.

Katër qendra të lëvizshme të shërbimit social u caktuan për përpjekjet e mbështetjes psikologjike të fatkeqësive në Kahramanmaraş, Osmaniye dhe Malatya. Gjithsej 698.244 persona kanë marrë mbështetje psikosociale, me 497.093 në zonën de tërmetit dhe 201.151 jashtë zonës së tërmetit.