Tërmeti tragjik/ Albin Kurti nga Durrësi: Që të mos kemi krizë humanitare duhet…

Kryetari i Lëvizjes Vetëvendosje dhe Kryeministri i ardhshëm i Kosovës, Albin Kurti, pas vizitës që i bëri sot familjeve të prekura nga tërmeti në Durrës tha për të mos pasur krizë humanitare, institucionet e Kosovës dhe Shqipërisë, si ato qendrore dhe ato vendore, duhet t’i ndihmojnë shqiptarët pa dallim, sa më shumë.

“Dëgjojmë për familje të ndryshme nga zona e Durrësit që kanë ardhur në Kosovë, por ne duhet ta ndihmojmë dhe mbështesim njëri-tjetrin, për këtë populli prin dhe jo politika. Vullnetarizmi ka nevojë për dy ushtritë tona, për dy policitë tonë në mënyrë rezultatet të jenë më të mira.”

Pushtetet vendore, tha Albin Kurti, do të ndihmojnë me statistika më të mira, ndërkohë populli po e kryen punën e bujarisë dhe mirëpritjes.

“Populli po tregon solidaritet dhe do të duhet që institucionet dhe qeveritë ta organizojnë sa më mirë këtë gjë. Nuk duhet të bjerë përkushtimi sepse mund të duket që ka rënë rreziku. Njerëzit duhet të vazhdojnë të jetojnë dhe punojnë, edhe pse në kushte më të vështira. Që të mos kemi elementë të ndonjë krize humanitare duhet që institucionet edhe në Kosovë, edhe në Shqipëri, edhe qendrore, edhe vendore ti ndihmojnë shqiptarët pa dallim sa më shumë.”