Tërmeti tragjik/ Prokuroria e Tiranës nis hetimet, ja tre veprat penale që do hetohen

Pas tërmetit tragjik të 26 Nëntorit me magnitudë 6.4 të shkallës Rihter që la 51 të vdekur, qindra të lënduar dhe dëme të mëdha materiale në Durrës dhe Tiranë, Pas Prokurorisë së Durrësit edhe Prokuroria e Rrethit Gjyqësor Tiranë ka filluar hetimet në lidhje me situatën e krijuar nga fatkeqësia natyrore.

“Hetimi ka si objekt kryerjen e veprimeve të shpejta në drejtim të sqarimit të rrethanave konkrete, që kane çuar në pasojat e ardhura dhe gjendjen e ndërtimeve”.

Mësohet se veprat penale që po hetohen janë, “Shpërdorim detyre”, parashikuar nga Neni 248 i Kodit Penal, ku do hetohet për organet që kanë miratuar lejet e ndërtimit dhe nëse ato janë dhënë në mbështetje të ligjit, si dhe nëse ndërtuesit kanë respektuar lejen e marrë, “Ndërtim i paligjshëm”, parashikuar nga Neni 199/a i Kodit penal, “Dhënia e ndihmës për ndërtim të paligjshëm”, Neni 199/b i Kodit Penal.

Në lidhje me këtë hetim Prokuroria e Rrethit Gjyqësor Tiranë, ka ngritur një grup hetimor. Në vijim të veprimeve të kryera, i kërkohet informacion Bashkisë Tiranë për banesat e evidentuara tashmë si të prekura nga tërmeti dhe të klasifikuara jo në kushtet e duhura për banim. I njejti informacion i është kërkuar dhe strukturave të tjera shtetërore.