Tetë të vdekur dhe qindra të plagosur si pasojë e tërmetit të ri në Turqi

Tetë njerëz kanë vdekur në Turqi dhe Siri pas tërmetit memagnitudë 6.4 të shkallës Rihter që ka goditur mbrëmë jugun e Turqisë, dy javë pas tërmetit shkatërrues që vrau mbi 45.000 njerëz.

Duke ju referuar Autoritetit turk të menaxhimit të fatkeqësive, RFE raporton se gjashtë persona u vranë dhe 294 të tjerë u plagosën në Turqi.

Ndërsa në Siri, një grua dhe një vajzë vdiqën si pasojë e panikut gjatë tërmetit në provincat Hama dhe Tartus.

Epiqendra e tërmetit ishte në qytetin Defne, në provincën Hatay të Turqisë, e cila kufizohet me Sirinë.

Tërmeti është ndier gjithashtu në Jordani, Qipro, Izrael, Liban dhe Egjipt, dhe u pasua nga një tërmet i dytë me magnitudë 5.8 shkallë të Rihterit.

Agjencia e Menaxhimit të Fatkeqësive dhe Emergjencave, AFAD, njoftoi se pas tërmetit me magnitudë 6,4 që ndodhi dje në provincën jugore turke Hatay, ndodhën edhe 90 pasgoditje, më e madhja prej të cilave ishte 5,8 ballë, transmeton Anadolu.

“Dje në orën 20:04 ka ndodhur një tërmet me magnitudë 6,4 ballë në rrethin Defne, Hatay. Më pas kanë ndodhur 90 pasgoditje, më e madhja prej të cilave ishte 5,8 ballë. Sipas informacioneve të marra nga SAKOM-i (Qendra e koordinimit të emergjencave), 294 shtetas të plagosur, 18 prej të cilëve rëndë, janë dërguar në spitale të ndryshme. Fatkeqësisht, humbën jetën gjashtë qytetarë tanë,” thekson AFAD përmes deklaratës.

Hatay ishte një nga provincat më të goditura në Turqi në tërmetin e 6 shkurtit. Mijëra ndërtesa u shkatërruan para dy javësh dhe tërmeti i së hënës i dëmtoi edhe më tej ato.

Sipas autoriteteve turke, raporton RFE, vetëm në Turqi kanë vdekur mbi 41 mijë persona nga tërmeti i 6 shkurtit, derisa besohet se mbi 385.000 banesa janë shkatërruar apo janë dëmtuar rëndë. Ndërsa në Siri kanë vdekur rreth 5 mijë persona.