T’fala Babales!

Të gjithë e kujtojnë shkronjësin e shquar të fjalimeve të kryeministrave socialist, Edi Ramën, i cili në ligjërimin e tij si kryetar i bashkisë së Tiranës, çdo pyetjeje që ndërlidhej me krimin dhe korrupsionin në institucionin që ai drejtonte, e që vinte nga TV Klan me pronar Sandër Frangajn, kishte vetëm një përgjigje!

Nuk ishte asgjë sekrete, që Sandri me Klanin e tij bënte zbardhjen e aktivitetit të Qeverisë Berisha. Çdo shitje dhe blerje, hyrje dhe dalje, ministri e kryeministri, Sali e Jozefinë, Ben Imam dhe Majlindë, Mediu e Rul, Pollo e Bumç, shikohej si eko nga televizioni në pronësi të Sandrit. Kjo gjë mund edhe ta irritonte Edi Ramën, por aty thjeshtë pasqyrohej puna e qeverisë, dhe ishte reale ajo që transmetohej në ekran, ndërkohë që edhe mund të editohej ajo pjesë që kishte të bënte me bëmat e sikletshme të këtyre protagonistëve.

Taksirati i gazetarëve në terren që ishin të punësuar tek Sandri ishte kur përballeshin me Edi Ramën, i cili kur pyetej nëse ka vjedhë ose ka marr ryshfet, kishte një përgjigje standarde: T’fala Sandrit!

Sot, shkronjësin e fjalimeve të kryeministrave socialist, shqiptarët e kanë për hise ta kenë kryeministër, por ama ligjërimin nuk e ka ndryshuar edhe pse më nuk i bënë t’fala Sandrit. Për punën e qeverisë që ai drejton aktualisht nuk ka medie që pasqyrojnë realitetin, qoftë ai edhe i reduktuar, siç e bënte Sandri për Berishën. Media e Sandrit na thoshte se u bë liberalizimi i vizave dhe njerëzit vërtetë filluan të lëvizin lirshëm, por sot mediat në unison mundohen të na bindin se njerëzit emigrojnë kot. Por kampet e refugjatëve nëpër Evropë, kërcënimi i shteteve të Zonës Shengen për rikthimin e vizave dhe papunësia me të dhënat e INSTAT-it qeveritar tregojnë të kundërtën.

Media e Sandrit raportonte për marrëveshjen e Detit me Greqinë, por sot pazaret e Ditmir Bushatit i dëgjojmë nga mediat greke, dhe nga ato shqiptare nuk kemi as

as realitet dhe as propagandë.

Media e Sandrit raportonte se Shqipëria u anëtarësua në NATO dhe ajo vërtetë u anëtarësua, por sot të gjitha mediat flasin për datën për çeljen e negociatave me të cilën janë dakord shtetet anëtare, por asnjë medie nga këto shtete anëtare nuk harron të thotë se sipas qeverive të tyre prodhimi dhe trafikimi i drogës si dhe krimi i organizuar janë pengesa më e madhe për çeljen e negociatave me Bashkimin Evropian.

Në këtë situatë, kur nuk njohim realitetin e punëve të qeverisë shqiptare, dhe jeta në Shqipëri po bëhet gjithnjë e më e vështirë, ndërkohë që nuk e raporton asnjë medie, rastësisht doli një individ me emrin Albert Veliu, i njohur në vendlindjen e tij Vlorë, si Babalja, i cili rrëfeu për opinionin se cila është veprimtaria kryesore e qeverisë me kryeministër Edi Rama në Shqipërinë e shkërmoqur.

Babalja mund të ketë reduktuar pjesë ku ai ishte protagonist, ama ekon që i bëri funksionimit të ministrisë së brendshme, dhe qeverisë Edi Rama, i mungon vetëm një logo televizive.

Në mungesë të një ekrani televiziv, PD u detyrua ta përdor foltoren e saj të partisë, dhe pronarit të së vërtetës së trafikimit të drogës nga strukturat e qeverisë shqiptare, Babales, ti jap fjalën për tu rrëfyer. Si prodhohet dhe tregtohet  droga në njërën nga portet më të rëndësishme në vend na i tha Babalja. Pse e gjithë kjo veprimtari menaxhohet nga vëllai i ministrit të brendshëm, ky i fundit mund ta dij ashtu si edh kreu i tij i qeverisë, por pasi u zbardhë nga Babalja, për opinionin e gjerë  kjo ishte një tronditje shumë e madhe. Aq e madhe sa hallakati edhe frekuencat e ERTV, të cilat ka kohë që Fuga nuk po arrinë ti kuron dot!

Madje as deputetët homolog gjerman të Taulantit, që u munduan të zhvendosin vëmendjen nga e vërteta e Babales tek e vërteta e integrimit evropian, nuk po arrijnë të zbehin zbardhjen e punës së qeverisë që i bëri një trafikant i vetëm i drogës, në shërbim të sejmenëve qeveritarë.

Sot, kur të gjitha televizionet vazhdojnë të jenë nën terrorin qeveritar dhe syrit mavi të ERTV-së, kur bllokimin e zbardhjes së punës së kabinetit qeveritar të Edi Ramës nga Albert Veliu, nuk arriti ta bllokoj as gjeniu mediatik i MJAFT-it, Qeverisë dhe gjithë Shqipërisë, Endri Fuga, opozita mund ti thotë kryeministrit, jo siç këndon Gjebrea, “Havale, mu bëre havale”, por “Babale mu bëre Babale”. Ndërsa  sulmet ndaj opozitës me libër shpie e shqupi, survejim e poshtërim nga shkronjësi i fjalimeve të kryeministrave socialist, Edi Rama, kanë vetëm një përgjigje: T’fala Babales!