Thaçi dekoron Presidentin Bush me Urdhrin e Pavarësisë. Ai e këshillon…

“Në Dallas takova mikun e madh të lirisë dhe pavarësisë së Kosovës, Presidentin George W. Bush. Në këtë takim të ngrohtë e miqësor diskutuam për të gjitha zhvillimet politike në Kosovë dhe rajon.” Kështu u shpreh Presidenti i Kosovës, Hashim Thaçi duke bërë të ditur se ka dekoruar Presidentin George W. Bush me Urdhrin e Pavarësisë, për kontributin e tij për lirinë dhe pavarësinë e Kosovës ndërsa shtoi se respekti për familjen e mrekullueshme Bush do të jetë i përjetshëm për shqiptarët e Kosovës.

Me këtë rast Presidenti i Kosovës tha se me Presidentin Bush kanë trajtuar edhe tema të aktualitetit dhe se ai edhe e ka këshilluar atë.

“Bashkë evokuam shumë kujtime nga e kaluara jo e largët, mirëpo fokusi ynë ishte tek përpjekjet e tashme të shtetit tonë për të siguruar një të ardhme të sigurt dhe në paqe. Në kontekst të këtyre përpjekjeve, u pajtuam se është e domosdoshme arritja e marrëveshjes përfundimtare obliguese ndërmjet Kosovës dhe Serbisë, e cila do të shënonte mbylljen e konfliktit njëshekullor, njohjen reciproke dhe anëtarësimin e Kosovës në OKB, NATO dhe BE.”

Sigurisht se arritja e kësaj marrëveshjeje nuk është aspak e lehtë. Por, Presidenti Bush më dha një këshillë të çmuar, të cilën dua ta ndaj me ju.

“Ju si liderë nuk do të mbaheni në mend për vendimet populiste, por për vendimet e vështira dhe të drejta që merrni për vendin dhe popullin tuaj”.