Thaçi: Është koha për arritjen e marrëveshjes me Serbinë

Presidenti i Kosovës, Hashim Thaçi, duke folur në Konferencën e Sigurisë së Mynihut, që po i zhvillon punimet në Minsk të Bjellorusisë, tha se është koha për arritjen e një marrëveshjeje ndërmjet Kosovës dhe Serbisë, e cila, sipas tij, do të nënkuptonte “njohjen e dyanshme”, raporton RFE.

“Lidershipi në Kosovë dhe Serbi e dëshiron një marrëveshje të tillë, SHBA-ja dhe BE-ja e dëshirojnë dhe po punojnë drejt arritjes së kësaj marrëveshjeje dhe, tani, pa hamendje, të gjithë duhet të lëvizim përpara”, tha Thaçi pranuar vështirësitë, por, edhe në rrethana të tilla, ai tha se sheh dritë në fund të tunelit.

Presidenti Thaçi, i cili udhëheq bisedimet me Serbinë, që ndërmjetësohen nga Bashkimi Evropian, ka proklamuar idenë e tij për ndryshimin e kufijve, apo, siç thotë ai, “korrigjimin” e tyre, si mundësi për normalizimin e marrëdhënieve midis dy vendeve.

Sipas Thaçit, ky korrigjim nënkupton bashkëngjitjen e Preshevës, Medvegjës dhe Bujanocit me territorin e Kosovës.

Një ide e tillë kundërshtohet nga partitë opozitare në Kosovë, por edhe nga kryeministri Ramush Haradinaj, i cili vazhdimisht ka paralajmëruar se prekja e kufijve mund të bëhet vetëm me luftë.