Thaçi: Heroizmi i Jasharajve mobilzoi botën shqiptare
Njësitet e Forcës së Sigurisë së Kosovës parakaluan sot në nderë të Epopesë së UÇK-së. Aty ku u bën bashkë të gjithë liderët institucional të Kosovës, Presidenti Hashim Thaçi tha se Kosova është storie e suksesshme, dhe secili qytetar duhet të ndjehet krenar me lirinë dhe pavarësinë e vendit.
“Sot institucionet më të larta shtetërore nderojnë heroizmin dhe sakrificën më të madhe, nderojnë familjen Jashari, komandantin legjendar Adem Jashiri, Hamzen dhe gjithë të rënët me 5,6,7 mars në Prekazin heroik. Heroizmi i Jasharjave mobilizoi botën shqiptare kudo. Heroizmi i Jasharajve dhe lufta e tyre titanike i vuri në lëvizje gjithë diplomacinë botërore”, tha Presidenti i Kosovës, Hashim Thaçi tha se Kosova e ka të qartë rrugën e vet përpara që është në rrugë të drejtë euroatlantike.
Ndërkohë Presidenti i Kosovës, Hashim Thaçi, i shoqëruar nga Kryetari i Skenderajt, Bekim Jashari, dhe ai i Drenasit, Ramiz Lladrovci, ka bërë nderime në kompleksin memorial “Adem Jashari” në Prekaz për nder të Epopesë së UÇK-së.
Presidenti Thaçi tha se po shënojmë ditët e Epopesë së Ushtrisë Çlirimtare të Kosovës, ditët kur komandanti legjendar Adem Jashari, familja Jashari, bënë atë që askush në botë nuk e kishte bërë, sakrificën më sublime për lirinë, pavarësinë dhe bashkimin kombëtar.
“Lufta heroike e komandantit legjendar dhe familjes Jashari është nderi dhe krenaria e kombit. Në të njëjtën kohë është edhe udhërrëfyesi për të ardhmen, për shtetin e Kosovës, për kombin shqiptar, për të ardhmen tonë, që të jemi sa më shpejt pjesë e NATO-s dhe Bashkimit Evropian, që të jemi një vend i zhvilluar, i progresit, një vend që do të ndihet mirë çdo qytetar për të jetuar, do të ndihet edhe krenar. Prandaj, edhe njëherë lavdi dëshmorëve të kombit, lavdi komandantit legjendar Adem Jashari dhe zoti e bekoftë familjen Jashari,” tha Presidenti i Kosovës, Hashim Thaçi.
