Thaçi i rikthehet idesë për korrigjimin e kufirit me Serbinë

Presidenti i Kosovës, Hashim Thaçi në një dalje publike pas tensioneve që krijoi me Serbinë dhe serbët që ka në koalicion qeverisës, tha se nuk e pëlqen betejën politike të ditëve të fundit në vend por ka besim se kjo situatë do të tejkalohet në ditët dhe javët në vazhdim, siç tha, me vullnetin e njerëzve institucionalistë që kanë ditur të marrin vendime të rëndësishme për të mirën e vendit.

Me këtë rast Thaçi iu rikthye diskutimit për idenë e tij rreth korrigjimit të kufirit me Serbinë. “Propozimi im për korrigjimin e kufirit me Serbinë do të përfshijë edhe bashkimin e Preshevës, Bujanocit dhe Medvegjës,” tha Thaçi duke shtuar se kjo është në kundërshtim të plotë me ndarjen e Kosovës apo të Asociacionit Plus që do të nënkuptonte paralizim të shtetit të Kosovës.

Beson tek arritja e konsensusit politik sepse sheh shumë pika që e bashkojnë spektrin politik në këtë drejtim.

“Janë së paku katër pika që na bashkojnë. Të gjithë jemi që marrëveshja për normalizimin e marrëdhënieve me Serbinë të gjenerojë njohjen e Kosovës nga Serbia; që menjëherë të bëhet shtet anëtar i OKB-së, e të lëvizë drejt BE-së dhe NATO-s dhe mekanizmave tjerë; të gjithë jemi kundër ndarjes së Kosovës dhe kundër Asociacionit Plus; dhe të gjithë e dimë se statusqou-ja është e paqëndrueshme”, tha Thaçi i cili pa demagogji nuk arriti të flas edhe në këtë dalje publike nga Presidenca.

“Unë nuk shoh asnjë pengesë që në ditët e ardhshme të mos bëhemi bashkë me një platformë të përbashkët dhe me një delegacion gjithëpërfshirës në përputhje me Kushtetutën e Republikës së Kosovës,” tha Thaçi i cili foli edhe për viza, ndërkohë nuk harroi të flas për meritat lidhur me FSK-në.

“Jemi shumë afër kur do të ndodhë transicioni i FSK-së në Forca të Armatosura të Kosovës. Po i vije fundi kësaj, në ditët dhe javët e ardhshme. Ky proces do të jetë transparent, unifikues për spektrin politik dhe për qytetarët. Do të bëhet në koordinim dhe në mbështetje të plotë me SHBA-në, e kjo u konfirmua edhe në vizitën shtetërore që kishim në SHBA,” tha Thaçi i cili sot përveç se kishte modestinë u bë edhe trim edhe pse ishte shumë i paqartë lidhur me lëvizjen e tij në veri.

Lidhur me vizitën e tij në liqenin e Ujmanit, Presidenti i Kosovës tha se nuk ka marrë kurrë leje dhe nuk do të bëjë diçka të tillë për të vizituar Ujmanin dhe veriun e vendit.

“Kosova është shtet i lirë, një dhe unik, demokratik, multietnik në të cilin liria e lëvizjes është e garantuar për të gjithë qytetarët kudo pavarësisht vështirëve teknike që mund të paraqiten aktualisht. Dje sikurse herët tjera vizitova veriun dhe do t’i vizitoj sa herë që e shoh të nevojshme në agjendën time. Kurrë s’kam marrë leje as kurrë s’do të marrë për diçka të tillë. Ka qenë shumë vizitë transparente. Qytetarët e Kosovës kanë të drejtë të lëvizin lirë në çdo cep të territorit të Republikës së Kosovës”, tha ai duke shtuar se leje për të vizituar veriun duhet të kërkojnë vizitorët nga Serbia,  dhe duke e konfirmuar edhe një herë se e ka të paqartë se për pak ditë shqiptarët e Kosovës do të kenë mundësi të lëvizin lirshëm në Evropë por  jo edhe në Kosovë, sepse më shumë se 1/3 e territorit e kontrollon Vuçiçi me kriminelët e tij, dhe e vetmja mundësi për të lëvizur nëpër këtë zonë kriminale është me ROSU dhe FIT, luks të cilin nuk e kanë të gjithë qytetarët e Kosovës siç e kishte ai dje nëpër liqenin e Ujmanit.