Thaçi në SHBA, kryeson delegacionin në Asamblenë e OKB

Presidenti i Kosovës, Hashim Thaçi ka udhëtuar drejt Shteteve të Bashkuara, ku do të kryesojë delegacionin shtetëror në punimet e Asamblesë së Përgjithshme të Kombeve të Bashkuara.

Gjatë qëndrimit në SHBA, presidenti Thaçi do të marrë pjesë edhe në pritjen e përvitshme të presidentit amerikan, Donald Trump dhe Zonjës së Parë, Melanie Trump, bëhet e ditur në një komunikatë për media.

“Gjatë qëndrimit në New York, presidenti Thaçi do të zhvillojë takime me homologë nga shtete të ndryshme të botës, për të thelluar bashkëpunimin bilateral dhe rritur numrin e njohjeve shtetërore dhe anëtarësimeve në organizata ndërkombëtare. Delegacioni i Kosovës, gjatë qëndrimit në New York, do të ketë takime të shumta me liderë botërorë, përkatësisht me presidentë, kryeministra dhe kryediplomatë të shteteve të ndryshme”, theksohet në komunikatë.