Thaçi në Shkup, Marrëveshja me Serbinë mund të shtyhet!

“Ne veç kemi filluar të diskutojmë, negociatat do të intensifikohen në të ardhmen, një marrëveshje mund të shtyhet por do të jetë me një kosto të madhe. Marrëveshja do të jetë e një kompromis të debatueshëm në Kosovë e Serbi”, tha Presidenti i Kosovës, Hashim Thaçi, në një konferencë të përbashkët me kryeministrin e Maqedonisë, Zoran Zaev në Shkup ndërkohë u takua edhe me kryetarin e BDI-së, Ali Ahmeti ku bisedoi për dialogun Kosovë-Serbi dhe referendumin e 30 shtatorit.

Shqiptarët duhet të dalin në Referendum

Presidenti i Kosovës, Hashim Thaçi, i cili po qëndron për një vizitë zyrtare në Shkup është pritur sot nga kryetari i Bashkimit Demokratik për Integrim, Ali Ahmeti, ku është biseduar rreth referendumit të 30 shtatorit si dhe zhvillimeve në rajon, me theks të veçantë mbi dialogun midis Kosovës dhe Serbisë.

Me këtë rast kreu i BDI-së njoftoi presidentin e Kosovës mbi mbarëvajtjen e fushatës për referendum duke nënvizuar rëndësinë e madhe që ka zbatimi i suksesshëm i marrëveshjes së Prespës.

Kryetari Ahmeti dhe presidenti Thaçi u dakorduan që shqiptarët dhe në përgjithësi të gjithë qytetarët e Maqedonisë duhet të dalin masovikisht dhe të votojnë pro integrimit në NATO dhe BE.

Bashkëbiseduesit konkluduan që e vetmja e ardhme për vendet e Evropës Juglindore, që siguron paqe të qëndrueshme, siguri dhe stabilitet, është integrimi euroatlantik.

Ahmeti mbështeti tërësisht përpjekjet intensive të institucioneve të Kosovës me ndihmesë ndërkombëtare për zgjidhje përfundimtare të dialogut me Beogradin mbi demarkacionin e kufirit.

Thaçi shqetësohet për BE-në!

Presidenti i Kosovës, Hashim Thaçi, në një konferencë të përbashkët me kryeministrin e Maqedonisë, Zoran Zaev tha se Kosova është unike sa i përket dialogut me Serbinë dhe Bashkimi Evropian nuk mund të pranojë në gjirin e vet vende me probleme të hapura, andaj. Kjo është një shtysë që këto negociata për normalizimin e marrëdhënieve të vazhdojnë.

“Kosova është unike sa i përket dialogut. Të gjithë e dinë që pa dialog dhe pa negociata me Serbinë nuk do të mund të arrijmë marrëveshje paqësore me Serbinë. Sot BE-ja është duke u modernizuar, por edhe ka hapur dyert për ne. Por BE-ja nuk pranon në gjirin e vet vende me problematika të hapura”, tha Thaçi duke shtuar se se negociatat me Serbinë do të intensifikohen në të ardhmen, mirëpo një gjë e tillë do të ketë kosto të madhe ndërsa përmendi edhe demarkimin e kufirit me Kosovën.

“Duhet të jemi realistë, duhet përmbyllet procesi i demarkimit të kufirit mes Kosovës dhe Serbisë e që është rreth 430 kilometra. Marrëveshja do të jetë e frymës evropiane dhe e koordinuar në plotëni me SHBA-të dhe Bashkimin Evropian.  Në këtë drejtim do të kemi një proces kompleks, në të cilin do të ketë debate dhe refuzime jo të lehta”, ka shtuar Thaçi.

Presidenti i Kosovës ka folur edhe për rezolutën e propozuar nga përfaqësuesit e Luginës, për bashkim me Kosovën, ku theksoi se e mbështetë fuqishëm një rezolutë të tillë, ndërkaq që ka shtuar se Kuvendi i Kosovës do të vendosë në bazë të bindjes së partive politike

“Unë personalisht e mbështes fuqishëm, në parlament janë partitë dhe atyre u mbetet të deklarohen. Mirëpo unë do ta respektoj vendimin e Kuvendit të Kosovës. Në rast të një arritjeje të një marrëveshjeje ligjërisht të obligueshme, procesi do të kalojë përmes një referendumi e pastaj në Parlament. Pra do të vendosin qytetarët e Kosovës dhe nuk do të mund të pengohet nga asnjë grup apo individ”, ka përfunduar Thaçi.