Thaçi nuk ka autorizim nga parlamenti por thotë se ka zgjidhje: Referendum për marrëveshje përfundëmtare!

Pas deklaratës së papritur që dha dje lidhur me shkëmbimin e territorit me Serbinë si borxh që ai i paska Luginës së Preshevës, sot Presidenti i Kosovës, Hashim Thaçi në një prononcim për media thekson ka deklaruar se nuk do të ketë ndarje, as shkëmbim të territoreve në mes të Kosovës dhe Serbisë, por korrigjim kufijsh, që sipas tij, korrigjimi i kufijve nuk përfshin ndarjen e Kosovës. Në rast të arritjes së marrëveshjes përfundëmtare,  Hashim Thaçi duke mos arritur të marrë besimin e shumicës në parlament, ashtu sikur se homologu i tij serb Vuçiç propozon:

“E shoh të domosdoshme organizimin e një referendumi të qytetarëve të Kosovës!”

I pyetur për paralajmërimet se këto ditë veriu i Mitrovicës mund të shpall autonomin e saj, ai tha se nuk do të lejojmë cenimin kushtetues të Kosovës dhe rikujtoi se edhe më herët ka pasur paralajmërime të tilla, por që institucionet e Kosovës do të punojnë për të ofruar siguri për gjithë qytetarët e Kosovës.

“Ka pak gjasa që Serbia të refuzojë mirëpo unë theksoj kërkesën legjitime, mund të imagjinoj reagimin e Beogradit që do të jetë refuzues por kërkesa e shqiptarëve të Preshevës, Medvegjës dhe Bujanocit është legjitime. Prandaj unë e shoh si mundësi të vogël dhe teorike që Serbia të pengoje kërkesën e shqiptarëve të Preshevës, Medvegjës dhe Bujanocit.  Është përgjegjësi morale, historike që të shtyhet përpara kjo kërkesë.”

Thaçi tha se flet për ato që i bien mirë shtetit të Kosovës:

“Unë flas vetëm për shtetin e Kosovës, ajo që i bie mirë shtetit të Kosovës dhe që e fuqizon, ndërsa sa i përket ideve të Serbisë të kamotshme për ndarje, shkëmbim, as nuk janë ide të mija e as nuk janë në diskutim, këto janë kategorikisht në kundërshtim me Kushtetutën,” tha ai duke shtuar se Kosova bën marrëveshje me Serbinë vetëm si vend sovran se çfarë do të parashtrojë Serbia unë nuk marr përgjegjësi, do të marr përgjegjësi vetëm në emër të vendit tim dhe qytetarëve të mi.

Thaçi tha se nuk do të ketë asnjë marrëveshje nëse nuk arrihet pajtim mes Kosovës dhe Serbisë.

“Në funksion të kësaj kërkese legjitime, paraqet një mundësi reale dhe kam thënë se Kosova duhet të jetë e gatshme për të debatuar për Luginën e Preshevës me Serbinë. Kushdo që i prezanton opinionit diçka tjetër le të jetë i bindur se Kosova dhe Serbia do të përballën patjetër me demarkacionin, 400 kilometra mes tyre,” ripërsëriti Presidenti i Kosovës duke sqaruar se të gjithë duhet ta kenë të qartë kërkesën legjitime të krerëve politikë të shqiptarëve të Luginës.

“Ne duhet t’i përgjigjemi kësaj kërkese të drejt, racionale dhe historike që mund të realizohet në mënyrë paqësore. Nuk mund të jem më i qartë se kaq, kjo mundësi është krijuar dhe nuk është e hapur përgjithmonë kështu që nuk duhet të humbet një momentum i tillë”, tha Hashim Thaçi të cilin ende askush nuk e kupton se pse u kujtuan pikërisht në këtë moment për Luginën e Preshevës kur për këtë problem të madh vetëm ai gjithmonë ka heshtur .

Për dallimet mes partive dhe paaftësinë për të ndërtuar një konsensus të gjerë në Kosovë, ai tha se janë për keqardhje.

“Unë ende shpresoj te mençuria dhe guximi i liderëve për tu bashkuar sepse nuk kemi kohë për të humbur. Ata që mendojnë se koha është në favorin tonë, janë krejtësisht të gabuar dhe nuk kanë as idenë më të vogël për zhvillimet dinamike që po ndodhin në arenën ndërkombëtare. Takimi i radhës në kuadër të dialogut do të mbahet në shtator dhe do të shtohet edhe dinamika e punës”, ka thënë tutje Thaçi.

Secila palë që për çfarëdo arsye refuzon dialogun apo pretendon të tërhiqet, sipas tij,do të ballafaqohet me pasoja në procesin e integrimeve euroatlantike.

“Është teori e gabuar se Kosova është e aftë të pengoj Serbinë në BE, e një rast të veprimeve të pamatura Bashkimi Evropian dhe SHBA-të do të identifikonin si të paaftë dhe fajtore për ikjen nga dialogu dhe shtyrjen e marrëveshjes përfundimtare. Si pasojë, të gjithë e dinë se BE nuk do të hezitonte fare që për shkak të mungesës së gatishmërisë së Kosovës, ti mundësoj Serbisë anëtarësimin në BE, ndërsa Kosova do të rrezikonte të humbiste mbështetjen e partnerëve evropian duke mbetur e izoluar dhe e pashpresë për anëtarësim në NATO dhe në OKB”, ka theksuar Thaçi duke rikujtuar se në tri dekadat e fundit ai që ka refuzuar dialog, ka dal humbës.

“Individë nga udhëheqja politike kanë dëshmuar se kanë potencial të mjaftueshëm negativ për të penguar Kosovën në proceset e saja integruese. Sido që të jetë, parlamenti mbetet institucioni i vetëm i përfaqësimit të interesave të qytetarëve të vendit, por pyetja që shtrohet është a po kryen gjithmonë me suksese detyrat e tij, e përgjigjen mund ta japin qytetarët. Mendoj që ka ardhur koha të fuqizojmë zërin dhe momentin në rolin vendimmarrës të qytetarëve”, ka shtuar Thaçi.

Në asnjë  rrethanë tha ai nuk do të ketë marrëveshje me kërcënime dhe thirrje lufte, porse marrëveshja do të jetë në mënyrë paqësore dhe në përputhje me interesin shtetëror të Kosovës me njohje reciproke.