Thaçi paguan gjysmë milioni euro për një takim me Trumpin

Në janar të këtij viti, Presidenca e Kosovës ka paguar 517 mijë e 198 euro e 56 cent para të buxhetit të shtetit, për një kompani lobimi amerikane, e afërt me presidentin Donald Trump. Në kontratën me kompaninë “Ballard Partners” thuhet se ky gjysmë milioni ishte ndarë për shërbime të konsulencës, për nevojat e Zyrës së Presidentit, raporton KTV.

Por jo rastësisht presidenti Thaçi ka zgjedhur pikërisht këtë kompani. Duke marrë parasysh afërsinë e drejtuesve të kompanisë me zyrën e presidentit Trump, Thaçi ka synuar realizimin e një takimi me presidentin amerikan.

Këtë e ka bërë publike vetë udhëheqësi i kësaj kompanie, Brian Ballard.

Në dokumentin e lëshuar nga Departamenti i Drejtësisë së kësaj kompanie, thuhet se Ballard është takuar më 20 prill në Mar-A-Lago me Presidentin Trump, të cilit ia ka bartur kërkesën e Ambasadores së Kosovës në Washington, për të mundësuar realizimin e një takimi me presidentin Hashim Thaçi.

Ndarja e miliona eurove nga presidenti Thaçi, fillimisht për autobiografinë e tash për këtë synim, shihet si keqpërdorim i parasë publike në përpjeke për rregullimin e imazhit të tij.

Këto dyshime pritet t’i vërtetojë komisioni hetimor i themeluar nga Kuvendi.

Ky komision shumë shpejt pritet të nisë punën dhe pritet të hetojë të gjitha dokumentet e qeverisë dhe presidencës dhe paratë e shpenzuara me këtë qëllim.

Sidoqoftë, ende nuk është e qartë nëse Trump e ka pranuar kërkesën e Thaçit.

Brian Billard ka raporte personale me Presidentin Trump dhe pas fitores së republikanit, i ka bartur zyrat e tij në Washington.

Kompania e tij, përveç Kosovës, në SHBA bënë lobon edhe në emër të qeverive të Azerbajxhanit, Republikës Dominikane, Katarit dhe Turqisë.