Thaçi: Presheva, Bujanoci e Medvegja të bashkohen me Kosovën

Presidenti i Kosovës, Hashim Thaçi ka takuar në Gjenevë përfaqësues të shoqatës “Medvegja” dhe shoqatave të tjera nga Lugina e Preshevës, të cilët e përshëndetën gatishmërinë e Kosovës për të respektuar vullnetin e shqiptarëve të Luginës së Preshevës, të shprehur në referendumin e vitit 1992.

“Atyre ua konfirmova që mbështes kërkesën e tyre që Presheva, Bujanoci e Medvegja të bashkohen me Kosovën”, shkruan Thaçi në Facebook ndërsa po merr pjesë në Forumin Ekonomik Botërorë në Gjenevë, ku liderët e rajonit po diskutojnë rreth modaliteteve për nxitjen e bashkëpunimit ndërmjet politikëbërësve në dobi të një Ballkani të qëndrueshëm.

Përveç presidentit Hashim Thaçi dhe kryeministrit Edi Rama, në këtë Forum po marrin pjesë edhe kryeministri i Kroacisë, Andrej Pllenkoviq, presidenti i Sllovenisë, Borut Pahor, ministrja e Mbrojtjes së Gjermanisë, Ursula von der Leyen, ministri i Jashtëm i Turqisë, Mevlüt Çavuşoğlu, ministrja për Presidencën Bullgare të Këshillit të Bashkimit Evropian 2018, Lilyana Pavlova,Zv/sekretarja e Shtetit dhe Zv/drejtorja Politike në Departamentin Federal të Punëve të Jashtme të Zvicrës, Krystyna Marty, ministri i Punëve të Jashtme dhe Çështjeve Evropiane të Sllovakisë, Miroslav Lajçak, si dhe kryeministrja e Serbisë, Ana Brnabiq.

Në cilësinë e nikoqirëve të këtij forumi janë Klaus Schwab, themelues dhe drejtor ekzekutiv pranë Forumit Ekonomik Botëror, ish-Ministri i Jashtëm i Norvegjisë, Borge Brende, president dhe anëtar i bordit drejtues në Forumin Ekonomik Botëror, si dhe Martina Larkin, Drejtoreshë e Departamentit për Strategji Rajonale, Evropë dhe Azi, si dhe anëtare e komitetit ekzekutiv të Forumit Ekonomik Botëror.