Thaçi takon Ambasadorët e Quint-it; thotë se duhet qeveri gjithëpërfshirëse

Presidenti i Kosovës, Hashim Thaçi, takoi sot Ambasadorët e Quintit dhe atë të Bashkimit Evropian në Prishtinë, për t’i informuar për, siç tha, hapat që do t’i ndërmarrë pas shkarkimit të Qeverisë së Kryeministrit Albin Kurti nga Parlamenti i Kosovës, javën e kaluar.

Në një njoftim e Presidencës së Kosovës thuhet se gjatë kësaj jave presidenti do të ketë konsultime me të gjitha partitë parlamentare, për t’i marrë sugjerimet dhe këshillat e tyre se cilën rrugë duhet ndjekur, duke u bazuar në Kushtetutën dhe ligjet e Republikës së Kosovës, raporton RFE.

“Pas shkarkimit të Qeverisë nga Kuvendi i Kosovës, më 25 mars, do të marr hapa gjithnjë në përputhje me Kushtetutën e Kosovës, me ligjet e Kosovës dhe me detyrat si president i Republikës së Kosovës”, është shprehur Thaçi duke shtuar:

“Shteti ka nevojë për një qeveri që do të sjellë stabilitet, unitet sa më të madh politik dhe qytetar, që do të jetë gjithëpërfshirëse dhe e orientimit të qartë euroatlantik.”

Te vendet e Quintit bëjnë pjesë: Franca, Gjermania, Italia, Mbretëria e Bashkuar dhe Shtetet e Bashkuara.

Ndryshe, Parlamenti i Kosovës, më 25 mars, ka votuar mocionin e mosbesimit ndaj Qeverisë Kurti.

Lëvizja Vetëvendosje, e udhëhequr nga Albin Kurti, ka deklaruar se pas votimit të mocionit duhet të mbahen zgjedhje, por pasi Kosova ta ketë kaluar pandeminë e koronavirusit.

Kryeministri në detyrë i Kosovës, Albin Kurti, tha se duhet të ketë qeveri të re, por vetëm pas mbajtjes së zgjedhjeve, duke kundërshtuar kështu iniciativën e Thaçit për t’u konsultuar me partitë, me qëllim që të krijohet ekzekutivi i ri.