Thaçi vazhdon ta mbajë sekret bisedën me Vuçiçin, të cilën e konsideron të vështirë

E ka cilësuar si një ndër takimet më të vështira që ka pasur me homologun serb, Aleksandër Vuçiç, por presidenti Hashim Thaçi nuk ka qenë në gjendje të tregojë se çfarë konkretisht kanë diskutuar në këtë takim, raporton KTV.

Thaçi tha se në takim ka paraqitur qëndrimin e institucioneve se Kosova është pro dialogut porse e vetmja marrëveshje e pranueshme, sipas tij, është njohja nga Serbia dhe anëtarësimi në të gjitha organizatat ndërkombëtare.

Nuk është e lehtë të bisedosh me Vuçiqin, i cili ende mendon se Kosova është pjesë e Serbisë, tha ai duke theksuar se ky qëndrim i tij është larg realitetit.

Thaçi nuk ka qartësuar nëse me presidentin serb ka diskutuar për shkëmbim territoresh.

Presidenti, ndër të tjera, ka theksuar se ndërmjet Kosovës dhe Serbisë nuk mund të ketë marrëveshje pa lehtësimin e ndërkombëtarëve dhe se roli i tyre, në veçanti i SHBA-së, është garanci për Kosovën.

Për rekomandimin pozitiv për vizat të Komisionit Evropian, presidenti Thaçi tha se aq sa është vlerësim pozitiv, është edhe përgjegjësi e shtetit të Kosovës dhe, sipas tij, vendi e ka merituar këtë.

Në  fund Presidenti i Kosovës tha se ka kërkuar nga institucionet e drejtësisë që ta vazhdojnë luftën kundër krimit dhe korrupsionit.