Thaçi vendos ti jap mandatin koalicionit të ri, Kurti: Do ta çojmë në Kushtetuese!

Pas paralajmërimit të Presidentit të Kosovës, Hashim Thaçi, se bazuar në vullnetin e partive politike nuk do të shpallë zgjedhje por do ti jap mandatin atij koalicioni që krijon “shumicën e re” ka reaguar Kryeministri në detyrë, Albin Kurti, duke e bërë të qartë se këtë Vendim do ta çoj në Gjykatë Kushtetuese.

“Pas thirrjes për mos zbatim të vendimeve të qeverisë, kjo e sotmja është përpjekja më e egër e presidentit për të shthurur rendin kushtetuese, vullnetin e shprehur me votë nga qytetarët po përpiqet ta mbyllë me një dekret antikushtetues ku do ta përjashtojë partinë e parë fituese të zgjedhje. Nga roli unifikues, presidenti sot doli në ilegalitet dhe formalizimi i deklarimeve të sotme do të përfundojë në Gjykatë Kushtetuese.

Këtë mundësi presidentit ilegalist ia mundësuan krerët e LDK-së, që braktisën çdo fjalë të thënë e të dhënë ndaj qytetarëve dhe ndaj nesh… Presidenti vazhdon të thirret në Kushtetutë dhe aktgjykimin e kushtetueses, por veprimet e tij të cilat janë në kundërshtim me nenet e Kushtetutës të cilave iu referuar dhe aktgjykimit që ai përmend, tregojnë se ai dhe stafi i tij nuk e kanë lexuar me kujdes të njëjtë ose mbase edhe nuk i kanë kuptuar.” 

Presidenti Thaçi ka zhvilluar konsultime me partitë parlamentare, sipas Albin Kurtit, me qëllim të vlerësimit të partive për zgjedhje të reja, apo qeveri të re, por kjo nuk është në kompetencën e tij vlerësimi i interesave të partive, por mbrojtja e rendit kushtetuese.

“Duke u munduar të na rrëzojë ne, është duke rrëzuar veten dhe pakthyeshëm. Sot një klub i stërvjetëruar politik treguan se nuk janë për zgjedhje, kështu duke thënë të vërtetën e mallit të tyre frikën e përballjes me vullnetin e qytetarëve.”

I pyetur nëse do ta lëshojë qeverinë pas formimit të qeverisë së re, Kryeministri në detyrë Albin Kurti ishte prerë:

“Më datën 6 tetor ka ndodhur ndryshimi madh, ka dalë zogu nga lëvozhga nuk kthehet më mbrapa. Presidentit i kanë mbetur edhe disa muaj mandat. Presidenti po tenton të kapë trenin e fundit, por i ka ikur treni i fundit, nuk ka më trena për presidentin dhe këto orvatje antikushtetuese sa e rrezikojnë rendin demokratik, por nuk mund ta shtypin vullnetin e popullit dhe të na kthejnë pas 6 tetorit… S’ka më datë tjetër, ku konjuktura e vjetër bëhen bashkë si një klub i stërvjetër që të na kthejnë mbrapa, kjo është e pamundur.”

E për ata si Isa Mustafa që “takimin e sotëm konsultativ” e projektuan si fundi i Kryeministrit Albin Kurti, ky i fundit paralajmëroi se do ta dërgojë Vendimin e Hashim Thaçit për formimin e qeverisë së re në Kushtetuese:

“Për qeveri të re kemi theksuar se duhet të mbahen zgjedhjet e reja, pas pandemisë, çfarëdo vendimi tjetër është devijim dhe kundër vullnetit të qytetarëve dhe tejkalim i kompetencave të presidentit. Ne do të ndjekim me kujdes se çfarë do të ndodhë në ditët e ardhshme dhe do t’i drejtohemi edhe Kushtetueses sapo të kalohet nga fjalët e presidentit në tekste të shkruara,” Kryeministri në detyrë Albin Kurti duke përsëritur se zgjidhja e vetme janë zgjedhjet e reja që do të mbaheshin pas përfundimit të pandemisë COVID-19.

Ndryshe, sot Presidenti i Kosovës, Hashim Thaçi, pasi ka dëgjuar të gjitha opinionet e partive politike, ka bërë të ditur se do ia jap mandatin cilësdo parti që siguron shumicën për krijimin e qeverisë së re.