Thellohet tragjedia në Turqi, 35 të vdekur dhe mbi 1.600 të plagosur

Ekipet e kërkim-shpëtimit gjatë natës edhe pse në temperatura të acarta kanë arritur të nxjerrin nga rrënojat 45 njerëz, kanë bërë të ditur autoritet turke ndërsa numri i të vdekurve nga tërmeti i fuqishëm që goditi lindjen e vendit ka shkuar në 35 persona.

Mediat e shumta vendore dhe ndërkombëtare kanë transmetuar pamjet ku shihet një grua 45 vjeçe dhe vajza e saj që kanë shpëtuar nën rrënoja edhe pas 28 orëve pas tërmetit me magnitudë 6.8 të shkallës Rihter, që ra mbrëmjen e së premtes rreth orës 21 në krahinën Elazig.

Ndërkohë ekipet e kërkim-shpëtimit vazhdojnë operacionin në kërkim të mbijetuarve në tri vende në këtë krahinë, ka bërë të ditur Autoriteti për Menaxhimin e Fatkeqësive dhe Emergjencave të Turqisë, AFAD.

AFAD sot raporton se tërmeti i fuqishëm i pasuar me 700 pasgoditje, ka lënë të vdekur 31 njerëz në Elazig dhe 4 në krahinën Malatyj ndërsa mbi 1.600 janë të plagosur.

Janë shembur mbi 70 pallate

AFAD paralajmëron njerëzit që të mos kthehen në shtëpitë e tyre të dëmtuara, për shkak të rrezikut nga shembja.

Ekspertët kanë konfirmuar se janë 645 ndërtesa të dëmtuara rëndë ndërsa 70  janë shembur. Ndryshe, Turqia është njëra ndër zonat më sizmike në botë që është dhe arsyeja e lëkundjeve të shumta. Në vitin 1999 në tërmetin me magnitudë 7.4 të shkallës Rihter që goditi Turqinë mbetën  të vdekur më shumë se 17.000 njerëz ndër të cilët qindra në Stamboll. Ekspertët konsiderojnë se në çdo moment ekziston mundësia e lëkundjeve më të fuqishme në Stamboll, në qendër ekonomike më të madhe në vend, me mbi 15 milionë banorë, ku ka godina të shumta janë ndërtuar pa plan dhe pa standarde sizmike.